2012 воын республикаын ытва кежлö дасьтысян ведомствояс-костса комиссия тöдмалöма, мый Колваö усьысь Безымянный-2 шорö пö веськалöма мусир.

Збыльысь, таво март 3 лунö Усинскын мусир перъянінын письтöма нефть чукöртан коллекторыс. Вöр-ва видзан районъяскостса Печораса прокуратураын уджалысьяс шыöдчöмаöсь ёрдö да корöмаöсь кыскыны кывкутöмö "ЛУКОЙЛ-Коми" ООО-öс. Таво июль 26 лунö Усинск карса суд индöма предприятиеыслы мынтыны матö 4,6 миллион шайт штрап.

Сентябрь 12 лунö Печораса прокуратураын зільысьяс Комиысь мупытшкöсса озырлунöн вöдитчан да вöр-ва видзан министерствоысь да öткымын мукöд ведомствоысь специалистъяскöд бара на волöмаöсь да видзöдлöмаöсь, весалöмаöсь-ö мусир перйысьяс шорсö да берегсö.

Но... Ва видзан визьын ясыда тыдалö мусир сорасыс. Му веркöссö тыртöмаöсь лыаöн, а вöр-ва видзан оланпас серти тайöс вöчны оз позь.

Безымянный-2 шорысь босьтöм ваын мусир сорасыс урчитöмаысь 214, а Колваö усянінын — 6 пöв унджык. Сэтысь жö босьтöм мусö химическöя туялöм бöрын тыдовт-чöма, мый нефть сорасыс сэні 5.333 пöв унджык. Ылöсас арталöмаöсь да, вöр-ваыслы лёксö вöчöмаöсь этша вылö 15 миллион шайт дон.

Кыдзи да мыйла татшöмыс вермис лоны? Нинöмö öмöй эз велöд 1994 воын Усинскын неминучаыс, кор потöм трубаысь ылькнитіс зэв уна мусир?! Аслас дум-вöзйöмöн юксьö Печораöс доръян комитетö пырысь Валентина Семяшкина.

—Та йылысь ми, Печораöс доръян комитетö пырысьяс, тöдім. И мый вöчсьö ставнас Усинск районын. Öд топыд йитöд кутам Колва, Нöвикбöж да Усвавом сиктъясын олысьяскöд. Сэтчöс войтыр оз кöсйыны, мед няйтчöдісны ю-шорсö, кöні найö кыйöны чери да урöсмöдісны парма-ягсö, кöні вöралöны.

Асьныс йöзыс юöртöмаöсь республикаысь ытва кежлö дасьтысян ведомствояскостса комиссиялы мусир перйысьяслöн став пакöсьт йылысь. Чайта да, колö ошкыштны вöр-ва видзан районъяскостса Печораса прокуратураын уджалысьясöс. Сэтчö локтісны выль йöз. Найö веськыд кывъяöсь, оз видзöдны чин вылö, ставсö вöчöны вöр-ва видзан оланпас серти. Сöмын лэдзасны-ö налы уджавнысö?

Тулыснас нин буретш прокуратураын зільысьяс Колваö усьысь куим шорысь аддзöмаöсь мусир сорас. Шыöдчöмаöсь судö, медым "ЛУКОЙЛ-Комилысь" перйыны 10 миллион шайт штрап.

Миян комитет ышöдіс казьтылöм сиктъясын олысьяcöс шыöдчыны Усинск карса администрация бердын котыртöм общественнöй экологическöй сöвет, а сідзжö карса администрацияöн веськöдлысь дорö, медым тайö дас миллионсö вуджöдісны сиктъяслöн бюджетö. Öд Колваын, Нöвикбöжын да Усвавомын зэв уна быдсикас гöрöдыс, кодъясöс быть колö разьны. А та могысь сьöмыс оз тырмы. Но воöм вочакывйыс чуймöдіс: тіянлысь шыöдчöмтö пö мöдöдім "ЛУКОЙЛ-Комиö".

Неважöн звöнитлі вöр-ва видзан районъяскостса Печораса прокуратураö. Сэні и юöртісны, 10 миллион пыдди бюджетö лишöдöмаöсь пö кык сюрс гöгöр шайт. А тöданныд-ö, мыйла буретш та мында? Комиын Росприроднадзор эскöдö, мусир перйысьяс пö тайö сьöм вылас асьныс весаласны няйтöсьтöм му-васö.

Но збыльвылас этша мый вöчöма. Сентябрын прокурор Дмитрий Перминов ветлöма сэтчö. И звöнитліс миянлы, Печораöс доръян комитетö пырысьяслы, да юöртіс, мый пакöститчанінас серпасыс абу вежсьöма. Со и артмö, мый Комиын Росприроднадзор пöтакайтö "ЛУКОЙЛ-Коми" ООО-лы. Дерт, сэсся мусир перйысьясыд вельмöны.

—А кутшöм вöлі серпасыс Сöвет власьт кадö? Гашкö, сэки мусир перйысьяс ёнджыка пыдди пуктісны вöр-ва видзан законсö?

—Бура тöдса, мый Печора вожын мусирсö заводитісны перйыны ко-льöм нэмся 70-öд воясын. И сизимдасöд вояс помланьыс нин эз этша вöв аварияыс. Медсясö мусир перъянінын. Колва юö нефть сорасыс унаысь жö веськавліс.

Батьлöн ёртыс, Николай Ануфриевич Патраков, нэмсö вöраліс да чери кыйис. Сійö висьтавліс татшöм вöвлöмтор. Кыйöма чери Колва тыын. Сэсся веськöдчöма гортланьыс. Пыжöн кывтöма Колва ю кузя. Казялöма, ва веркöстіыс пö мусир визьыс кывтö. Виччысьтöг аддзöма, кыдзи сы вылö ю веркöсöд биыс öдöбöн локтö. Вöлöмкö, мусир пер-йысьяс öзтöмаöсь, медым пакöстит-чöмсö дзебны.

А помнитанныд 1994 вося ыджыд неминучасö? Мир пасьтала сы йылысь юöрыс паськавліс. Но ыджыд чина йöз пиысь кодöскö кыскис- ны-ö кывкутöмö, кодöскö мыждісны?

Сьöкыд шуны, мый Сöвет власьт дырйи вöлі öнія кад серти тöдчымöн бурджык...

—Валентина Томасовна, но сэки мусир перйысь предприятие вöлі государственнöйöн, а талун сійö жö "ЛУКОЙЛ"-ыс олигарх киын...

—И сэки, и öні мусир перйысь предприятиеяс мынтöны республикаса да карса бюджетъясö вот. Та вöсна чина йöз паныд кыв шуны оз лысьтны, и стрöжитöм-чиршöдлöм йылысь сёрниыс абу. Татшöмъяс водзас Енлы моз кевмöны.

—Но Рытыввылын весиг гырысь компанияяс оз лысьтны пакöститчыны...

—Тайö тадзи и эм. Вайöда татшöм пример. "Эксон Вальдес" танкерысь мусирыс саридзö ылькнитіс-визувтіс. Помнитанныд, Мексика заливын ыджыд жö неминуча лоис. Кыкнан компаниясö чорыда мыждісны, найö мынтісны зэв гырысь штрап... 1994 воын жö Усинскса авария бöрын ни öти ыджыд чинаöс весиг эз чи- рыштны. Асьныд сэсся вöчöй кыв-кöртöдсö.

Аснаукöн олöм-уджалöмыд, вöр-ва видзан закон вылö сьöвзьöмыд мусир перйысьястö водзö вельмöдö. Усинск районын зэв уналаысь позьö аддзыны киссьöм мусир сорассö. И сьöкыд шуны, тöрыт али некымын во сайын письтöма нефтьыс. Пырысь-пыр жö колö эськö вöлі весавны-идравны. Сöмын "ЛУКОЙЛ-Ко-ми" ООО-лöн кöсйöмыс, тыдалö, абу.

—Тöдöны-ö суйöр сайын, кыдзи Россияын перйöны мусир да биару?

—Августын Усинскын вöлі войтыркостса конференция, кöні сёрнитісны Арктикаса шельфын мупытш-кöсса озырлун перйöм йылысь. Казьтышта, Аляска дорын буритчöны нин, Россияын Печораса губаын Приразломнöй куйлöдын сулалö нин мусир перъян платформа...

Тайö чукöртчöм вылас волісны Гринписысь, Мурманск обласьтса "Саами парламент" общественнöй котырысь, Ямал-Ненеч кытшысь селькупъяслöн да ненечьяслöн общинаясысь йöз, весиг Гренландияысь инуит. Дерт, вöліны и Комиысь вужвойтыр.

Чукöртчывны шуöма вöлі сы могысь, медым öтувтны войвывса вужвойтырöс да öтвылысь разьны мусир перйöмкöд йитчöм гöрöдъяссö. А тöжд-могыс збыльысь уна. Öні мöвпалöны Арктикаса шлейфын перйыны мупытшкöсса озырлунсö. Гöгöр саридз, коді йизьö-кынмö, быдлаын гöвкъялö гырысь йи пласт... А сэк жö му вылын оз сяммыны морт ногöн перйыны мусир. Друг кö лоö Мексика заливын кодь неминуча? Дерт, сэсся войвывса вужвойтырыд öтувтчöны.

Гöсьтъяскöд ветлім видзöдлыны мусир перйысьяслöн пакöститчöм вылö. Та могысь Усинсксянь Харъягаö мунан туй пöлöн ветлöдлім. Аддзöмторйыс шемöсмöдіс весиг Комиын олысьясöс, воöм йöз йылысь ог нин казьтыв. Серпасыс шуштöм. И тайöс зэв на небыда шуöма. Россияса Гринписын зільысьяс петкöд-лісны космоссянь вöчöм снимокъяс. На серти сöмын Усинск районын 200-лаын(!) киссьöма мусир сорасыс. Ичöтджык нефть сора гöптыс тайö снимокъяс вылас, дерт, эз веськав.

Миянöс, Печораöс доръян комитетö пырысьясöс, öтарö мыжалöны, ті пö сувтанныд прогресслы паныд. Некыдз пö он гöгöрвоöй, мый талун некод нин оз кöмав нинкöмтö. Да, ми кöсъям жö сöвмыны, но ставсö колö вöчны вöр-ва видзан оланпас серти. Медым Колваын, Нöвикбöжын, Усвавомын олысьяс вермисны пöль-батьяс мозыс жö кыйны чери, вöравны. Вужвойтыр та-дзи нэмсö олісны.

Веськыда кö шуны, мусир да биару перйöмыс öнöдз ньöти эз озырмöд сиктын олысьясöс. Усинск районса Закарваньын, Денисовкаын, Мутнöй Материкын абу бур туйыс. Усинсксянь Колваöдз 15 километр, а сиктас абу биару. Но и кодлы колö татшöм "прогрессыд"? Кодкö нажöвитчö-озырмöдчö, а миян чужан му водзö няйтчö мусир сорасöн.

—И мый вöчны?

—Куйлысь из улö пö ваыд оз письт. Чöв овны оз позь, колö мусир перйысьясöс мырдöн тшöктыны пыдди пуктыны вöр-ва видзан оланпастö. И сöмын öтвылысь вужвойтыр вермасны тайöс збыльмöдны.