Емдін районса Зöвсьöртысь "Русская душа" народнöй ансамбльын сьылöны куим чоя-вока. Медводз локтöма Нина Николаевна Ячменева. Регыд мысти нуöдöма Галина чойсö. А сэсся кык чой Леонид воксö ышöдöмаöсь сьывны.

Енсянь да мам йöвсянь

Чужлöмаöсь тайö енбиа куим чоя-вокаыс Емдін районса Римъя грездын. Бать-мамыслöн найö вöлöмаöсь сизимöн. Кыдзи висьталіс Нина Николаевна, быдмöмаöсь найö сьылігтыр уджалігöн.

—Миянöс водз уджöдісны, — висьталіс Нина Николаевна. — Турун пуктім, агсасим, горт гöгöр ноксим. И эг дышöдчöй, ставсö вöлі зіля вöчам.

Мича гöлöсыс налöн, кыдз шуласны, Енсянь да мам йöвсянь. Гортас ставöн чой-вок чукöртчасны да заводитасны сьывны. Дерт, и мамыс накöд. Ань вöлöма зэв мича да ён гöлöса.

—Шулывліс, эг кö пö ичöт грездын чуж, Есева моз жö артисткаöн лои, — водзö казьтыліс Нина Николаевна. — А ме школаын велöдчигöн пыр артисталі: сьылі да кадриль йöкті.

Но школа помалöм бöрын Нинаöс ыстöмаöсь совхозсянь велöдчыны видз-му овмöс техникумö бухгалтерö. Сэні тöдöмлун босьтігöн сійö унаысь жö ветлывлöма быд сикас сьылан конкурс вылö. Енбиа нылöс корöмаöсь эськö вуджны велöдчыны сьылысьö, но сійö абу лысьтöма. Öд бать-мамыс гöля олöмаöсь да нывсö велöдны абу вермöмаöсь.

—Но ме пыр сьылі и öнöдз на сцена вылын, — нимкодьпырысь висьталö Нина Николаевна. — Сьылігтырйи и сьöм арталі.

Неважöн Нина Николаевналы операция вöчöмаöсь. Думайтö нин вöлöм дугöдчыны клубö ветлöмысь, но... Муртса кок йылас сувтöма, гортас вöзйысьöма. Меным пö больничаас некор куйлыны. Врачьяс весиг чуймöмаöсь. Мукöд олöма мортсö пö мырдöн он ысты, а Нина Николаевна, мöдарö, гортас вöзйысьö.

И шогтö пальöдö

Сьыланкывйыд тай оз сöмын гаж дырйи юргы. Сійö и шогтö пальöдö. Галина Николаевна Пажильцевалöн кыкнан пиыс кадысь водз кулöмаöсь. Кутшöм сьöкыд мамыдлы ассьыс челядьсö кыз му улö дзебны! А нылыс кык челядьöс эновтöма. Ичöтыс кык арöса на вöлöма. И кыдзи нö таысь он шогсьы? Зонпосни сэсся ыджыд мам дорас и быдмöмаöсь. Öні ыджыдыс кöкъямысöд классö вуджис, а дзоляыс нёльöд класс помаліс. Заводитлöма эськö Галина Николаевна корсьны "кöк мамнысö", но... Водзын-джыксö эськö туй помыс Ростовысь сюрлöма, но öні весиг оз тöдны, кöні сійö.

—Мукöддырйисö сэтшöм сьöкыд лов вылад, — висьталö Галина Николаевна. —А татчö локтан, горöдан сьывны, и ставыс вунö.

Чойясыскöд — сцена вылö

Леонид Коковкин дзолядырсяньыс жö пыр сьылöма. Но артистö абу велöдчылöма. Уджавлöма вöр базаын крановщикöн.

Радейтö мужичöй и чери кыйны да вöравны. Кыдзи ачыс казьтыліс, челядьдырйиыс батьыслы öтарö дзайгö вöлöм, мед вöравны босьтас. Пуксяс пыжас да бöрдöмöн вöрö вöзйысьö. Сэсся ичöтсяньыс и прöмышляйтöма.

Леонид Николаевичлöн эм аслас лэч туй. Ылыссасö эськö öні, кокас операцияяс бöрад, оз вермы кытшовтны, но матыссасö кутö. Коля пиыскöд ветлывлöны вöравны.

—Öдва на вöлі ветлöдла, а чери кыйöмысь эг лэдзчысь. Пыжöдз лёнчикта, а сэсся йöткыштча дай, — нюмъялö мужичöй.

Леонид Николаевич ансамбльö сьывны локтöма ыджыд шог бöрын. Мужичöйлöн гöтырыс кадысь водз кувсьöма. Медым шогсö пальöдны да мукöд моз мед не юсьыны, петöма чойясыскöд сцена вылö.

—Кыйсьöм-вöралöмыд да сьыланкывйыд крепыда кутöны, лэдзчысьны оз сетны, — шуö сійö.

Гортын оз пукавсьы

"Русская душа" ансамбльын сьылысьяс тшöкыда ветлывлöны гастрольöн и Емдін районті, и республикаті. Петавлöны тшöтш мукöд регионö. Кöть и асланыс автобусыс абу, Кардорöдз ветлывлöны концертасьны.

Кыдзи висьталöны куим чоя-вока, весиг пö автобуссö мöдöдöны миянлы, мед сöмын волам. Ведасны-юкталасны, зэв шоныда вочааласны.

—Перымын да Кардорын кытысь тöдмалісны тіян йылысь? — юася налысь.

—Коркö Зöвсьöртын ярманга вылын сьылім, а сэтчö вöлöм локтöма Кардорысь культура керкаöн веськöдлысь, — висьталö Нина Николаевна. — Сьöлöмсö, тыдалö, вöрзьöдім да, и корисны волыны. Сэтчö сэсся зэв тшöкыда ветлывлам.

Туяд петалігöн быдторйыс овлö. Во нёль сайын вöлöм тэрмасьöны "Завалинка" вылö. Выльгортсянь нин пö звöнитчöны, мед öдйöджык локтам, гажыс заводитчöма да. А Зöвсьöртса артистъяс Эжваынöсь на.

—Мый вöчны? Заводитім автобусын костюмъяссö пасьтавны да краситчыны-баситчыны, — серамсорöн висьталіс Нина Николаевна. — А Выльгортса культура керка дорöдзыс автобусыс оз ну. Чеччöдіс да, котöртам. Кылам, миян йылысь нин юöртöны да, лэбыштім сцена вылö. Зэв бура на и петкöдчим. Повзьынысö весиг эг и удитöй.

—Он мудзöй татшöм ветлöм-мунöмсьыс?

—Окота да-й сьылам, — шуöны куим чоя-вока. — Гортад öд пыр он пукав, мый кöть и пенсия вылынöсь.