Кöрткерöс районса Керöс гöгöрысь пожöм-козсö заптö "Монди Сыктывкарса ЛПК". Сиктын олысьяс пузьöмаöсь-дöзмöмаöсь, кор казялöмаöсь, мый налöн вотчанін-кыйсянінысь вöрсö пузувтöмаöсь, а керассьысь öнöдз абу петкöдöмаöсь кер штабельяссö. Та йылысь "Коми му" газет гижліс нин.
Сиктсаяс чукöртчылöмаöсь скод вылö да бöрйöмаöсь вöр угоддьöясöн вöдитчöм кузя общественнöй сöвет, кытчö пырöма 11 медся пыдди пуктана морт.
Предприятиеса специалистъяскöд аддзысьлöм да сёрнитöм бöрын Керöсын олысьяс лöсьöдöмаöсь асланыс рöдъяслöн угоддьöяслысь да мукöд тöдчанаинъяслысь карта. Сійöс да гöгöрвоöдана письмö тавося май 25 лунö мöдöдöмаöсь Сыктывкарса ЛПК-ö.
Асьныс босьтчöмаöсь дорйыны
Тайö письмöас висьтавсьö, мый Керöс сиктса администрациялöн борд улö пырöны Керöс, Лаборöм, Уръёль да Эжол грездъяс. Сэтчöс олысьяслöн пöль-пöчыс да бать-мамыс овлöмаöсь Вась Эжъес, Максим Эжъес да Илья Эжъес пöчинокъясын, но ковмöма сэтысь сэсся налы мунны.
Талун налöн ныв-пиыс олöны оз сöмын казьтылöм сикт-грездын, но и Сыктывкарын да республикаса мукöд кар-районын. Ставныс найö быд гожöм волывлöны чужанінас. Эжъес гöгöрса яг-раскыс зэв уналы вывті дона.
Сиктсаяс оз кöсйыны, медым Сыктывкарса ЛПК дугöдіс вöр заптан уджсö. Но сэк жö лыддьöны, мый предприятиеыслы медводз колö быть петкöдны 2010-2011 воясын заптöм кражсö, быд во садитны керасъясын томиник пожöм-коз, отсавны ловзьыны Эжъес юлы да сы гöгöрса яг-раслы. Та кындзи оз ков керасьны Керöсса участкöвöй лесничестволöн сиктсаясöн вöзйöм кварталъясын.
Письмöас сідзжö гижöма, мый öткымын яг-рас збыль вылас абу нин. Найöс кералöмаöсь государственнöй предприятиеяс, ассьыныс пай пуктöмаöсь и браконьеръяс. Уналаын вöрсö пöрöдöма бушков, вына тöв ныр заводитöма пакöститчыны кольöм нэмся öкмысдасöд воясын, кор пармаыс ёнакодь нин кушмöма. Сэсся ягас нюжöдöма-вöчöма вöр петкöдан уна туй.
Вась Эжъес, Максим Эжъес, Илля Эжъес пöчинокъясö тшöкыда волывлöны йöзыс. Öд сэтчöс шойнаясын куйлöны налöн пöль-пöчыс да бать-мамыс. Сэтчöс пармаын унаöн вöралöны, Эжъес юын кыйöны чери. Сэні эм вежа гöра, мыжтöм мыжаяслы сувтöдöма крест, эм на и мельничалöн колясыс...
Сиктса мöвпалöны кыпöдны часовня. Кöсйöны нуöдны и этнофестиваль. Тайö уджас Сыктывкарса ЛПК тшöтш вермас пуктыны ассьыс пай.
Урчитöм кварталъясысь öтдор кö и мукöдлаын кутасны керавны вöрсö да оз кö кутны садитны томиник коз-пожöмсö, сэки косьмасны Эжъес ю да ёль, Одоким да Керöс шоръяс, Ыджыд ёль, Дзоля ёль. Косьмас и Ыджыд нюр, кöні вотчöны сиктса. Вермас лоны, и Керöс сиктса юкмöсъясын ваыс бырö...
Бура тöдса, мый талун сиктын абу уджыс. Йöзыс вотчöм весьтö нажöвитчöны, а сідзжö вöралöны да кы-йöны чери. А кыдзи нöшта перъян кынöмпöттö? Та вöсна и майшасьöны, мый вермас кушмыны-бырны яг-раскыс, коді öнöдз найöс вердö.
Сыктывкарса ЛПК-лы кöртымö сетöм угоддьöяслöн картаын мыйлакö абу индöма Дзоля, Ыджыд, Эжъес да Керöс ёльяслысь йывсö. Та вöсна найöс видзöм йылысь и сёрниыс абу. Быттьö и абуöсь.
Казьтылöм картаас абу и 43-öд кварталса керас, коді ясыда тыдалö космоссянь вöчöм снимокын.
Сыктывкарса ЛПК кö пыдди оз пукты сиктсалысь вöзйöмъяссö, йöзыс асьныс босьтчасны дорйыны пармасö, кольыштöм дісö, коді войтырöс талун вердö и водзö сетас позянлун перйыны кынöмпöт.
Сиктсасянь тайö письмöсö кырымалöмаöсь В.Н.Михайлов да В.Н.Королёв.
Куштöмсö нин?
Июнь помын "Монди Сыктывкарса ЛПК-сянь" воöма вочакыв. Сійöс лыддьöм бöрын сиктсаяс чуймöмаöсь: налысь корöм-вöзйöмсö быттьö абу и гöгöрвоöмаöсь.
Предприятиеын вöр заптöм кузя директор Аксель Бендер гижö, мый экономика, вöр-ва видзöм да социальнöй юалöмъяс тöд вылö босьтöмöн Сыктывкарса ЛПК вöзйö воöдчыны öти кывйö сэтшöм угоддьöяс кузя, кодъяс сикт дорсянь медся матынöсь. Сэні йöзыс вермасны и вотчыны, и вöравны...
А збыль вылас Керöс сикт гöгöрын предприятиеыс кöсйö кольны вöрзьöдтöг сöмын… куим кварталысь муртса унджык, кодъясöс, позьö шуны, куштöмаöсь нин. Сэк жö сиктгöгöрса дас кварталысь пожöм-козсö кöсйöны заптыны, а кольöм 22-сьыс мöвпалöны неуна сöмын кольыштны (схема вылас ясыда тыдалö).
Июль 20 лунö Керöс сиктса Вöр сöвет мöдöдöма Сыктывкарса ЛПК-ö мöд письмö, медым предприятиеса веськöдлысьяс выль пöв донъяласны сиктсалысь ко-рöм-вöзйöмсö да збыльысь шуасны казьтылöм яг-рассö видзöм кузя ассьыныс кыв.
Öні Керöсын, а сідзжö сэтысь рöднас Сыктывкарын да мукöд сикт-грездын нин олысьяс виччысьöны, мый та пöрйö вочавидзасны предприятиеöн веськöдлысьяс. Йöзыс збыльысь майшасьöны. /д сёрниыс мунö буретш налöн сиктгöгöрса яг-рас йылысь.