Кулöмдінын вежа Петыр да Павел апостолъяслöн вичколы таво тырис 200 во. Кыпöдны сійöс босьтчисны 1799 воын, 1810-öдын уджсö помалісны, а мöд вонас вежöдісны.
Сиктса олысьяслöн висьталöм серти, вичко посводзас (папертын) вöлöма Нерукотворнöй Спаслöн öбраз, кодöс ас кадö Ен отсöгöн вермöмаöсь видзны биысь — Николай Чудотворецлöн вичко сотчигöн шыбитöмаöсь Эжва юö.
Кольöм нэмся 30-öд воясö Петыр-Павеллöн вичколысь пытшкöссö вöлі мавтöма кельыдлöз рöмöн да мичмöдöма зарни серъясöн, дзоридзьясöн. Тані югъялöма ыджыд, мича паникадилö. Царскöй ворота öтар-мöдарладорас вöлöмаöсь колоннаяс. На бокын öта-мöдыслы паныда сулалöмаöсь сус пуысь вöлалöм, 1 метр судта, кианыс важ гижöдъяса анделъяс. Вичкосö мичмöдöмаöсь и важся мича öбразъяс, а шуйга кырлöс саяс öшалöма Николай Чудотворецлöн вежа öбраз, кодлы 1898 воын Николай II-öс коронуйтöмкöд йитöдын ньöбöмаöсь да ладмöдöмаöсь бронзаысь зарниалöм веркöс (риза).
1903 вося мартсянь 1906 вося декабрöдз Петыр да Павел апостолъяслöн вичкоын попалöма иерей Николай Доброумов. Кулöмдінö сійöс вуджöдöмаöсь Помöсдінса Богородицалöн Успение вичкоысь.
Николай вöлöма Кулöмдінса вичкоын 1879 восянь поп Николай Михайлович Доброумовлöн семьяын витöд кагаöн. Усть-Сысольскса духовнöй училище да Вöлöгдаса семинария помалöм бöрын Великий Устюгса епископ Гавриил 1899 воын бласлöвитіс сійöс служитны Помöсдінса вичкоын. А 1906 воын Кулöмдінысь Николай Доброумовöс вуджöдісны Аныбö.
Антонина да Николай Доброумовъяс
Антонина вöлі Межадорса Введенскöй вичкоысь поп Михаил Константинович Поповлöн, коми поэт Иван Куратов племянниклöн, семьяын медся ичöт да медмича нылукöн.
Сыысь кындзи семьяын быдмисны нöшта 10 чоя-вока, и Антонина, дерт, кöсйис аддзыны радейтана верöсöс да чужтыны сысянь уна челядь. Но нывлöн гуся мöвпъясыс эз збыльмыны. Весиг öтлаасьöм бöрас Николай Доброумов эз инмöдчыв гöтырыслы, оліс сыкöд чоя-вока моз, восьлаліс вежа ай Иоанн Кронштадтскийлöн кок туйöд. Антонина эз кöсйы миритчыны таöн, весиг некымынысь лöсьöдчыліс мунны верöс дорсьыс, но семьяыс вöлі паныд, и аньлы пыр ковмыліс бергöдчыны.
Николай батюшко нэм помöдзыс вöлі манакöн и олöм чöжыс кутчысис бöрйöм туйвизьö: вайöдіс йöзöдз Ен кыв, велöдіс овны Ен нога... Таысь 2001 вося октябрь 6 лунö Священнöй синод шуис иерей Николай Николаевич Доброумовöс вежаöн да пыртіс Коми му югдöдысь новомученикъяс лыдö.
Сьöкыд вояс
Кыдз тöдса, революция бöрын власьт босьтчис пыртöдны йöзöс компартиялы эскöмö, мырдöн бергöдны Ен дорысь. И буретш тайö кадас медшöр ышöдана кывъясыс вöліны: "Бырöдам-кисьтам вичкояс!" 1938 вося ноябрь 23 лунö "Ленин туйöд" колхозын котыртлісны чукöртчылöм, кöні чорыда шуисны: "Мырддьыны эскысьяслысь Петыр-Павеллысь вичкосö да СССР-са Верховнöй Сöветö бöрйысьöмöдз восьтыны сэні районса пионеръяслысь керка". Паныд мунысьясöс эз кывзыны, вичко тупкисны, попъясöс йöршитісны дзескыдінö.
Вичко алтарын писькöдісны öдзöсъяс, медым сэті вермис пырны сьöкыд техника, а вежа жырйын восьтісны... куритчанін. Яндзим тöдтöм йöз чукöртісны вичкоысь став öбразсö да нуисны сиктсöветö... ломтыны пач. Шуöны, сельсöветын пачсö сэки ломтöны вöлöм гозъя. Найö вежави-зöмаöсь, абу лысьтöмаöсь вöчны Ен водзын татшöм ыджыд мыжсö да вуджöмаöсь овны мöд сиктö.
Ловзян кад
Петыр-Павеллöн вичко выльысь "ловзьыны" кутіс 1991 воын, кор пенсионерка Агафья Егорьевна Кипрушева мукöд эскысьяскöд öтвылысь шуисны выльмöдны Кулöмдінса вежаинъяс. Общинасö лои котыртöма да пасйöма 1991 вося февральын. Сиктсöветöн веськöдлысь А.А.Липин сетіс сы борд улö Кулöмдінын вичкояслысь кольöм стрöйбаяссö: Петыр-Павеллысь 1 судтаа да Христово Воскресение да Ен Мамлöн Владимирскöй öбраз престолъяса 2 судтаа гожся храмъяс. Медводз шуисны дзоньтавны-выльмöдны Петыр-Павел апостолъяслысь тöвся вичкосö. Общинаса старöстаöн бöрйисны фронтöвик, Япониякöд да Айму вöсна Ыджыд тышъясса ветеран Милослав Николаевич Игнатовöс. Но уджö дзик пыр босьтчыны эз артмы. Быдса во Агафья Егорьевналы ковмис котравны начальство дорö, медым ДОСААФ эновтчис вичко жыръясысь. Та бöрын эскысьяс "Парма гор" газет пыр шыöдчисны районса олысьяс дорö вичко ловзьöдöмын отсöгла.
И йöзыс чукöстчисны. Важöн моз помечöн уджавны волывлісны эз сöмын кулöмдінсаяс, но и донса, ручса, керчомъяса, нöсимса... Висьталöм серти, ветымын мортöдз чукöрмывлöма, абу сöмын пöрысьяс отсасьöмаöсь, но и верстьö мужичöйяс, томулов да челядь.
Уджыс пуис: дзоньталісны алтар öдзöсъяс, рытыввывладорсянь писькöдісны выль пыранін. Вичко пытшкысь няйт-лöпсö машинаясöн ковмис петкöдлыны. Сöмын лыаыс некымын кузов чукöрмис. Нюжöдісны би, шоныд. Йöзыс вайисны коді öшинь стеклö, коді брус, краска, джодж пöв.
Кор храмын лои сöстöм да идöра, Агафья Егорьевна корліс Сыктывкарысь попъясöс. Бöрыннас найö кутісны волывлыны нуöдны службаяс, а Уллянаса манастыр воссьöм мысти и владыка Питирим кежавліс.
Агафья Егорьевна пуктіс ыджыд пай Петыр-Павеллысь вичкосö ловзьöдöмö. Ыззьöдіс эскысьясöс и изйысь кык судтаа храмсö дзоньтавны, но эз удит – водзмöстчысь мортöс виисны лёк йöз. 1995 вося декабрь 18 лунö, 78 арöса аньöн радейтана вежа Николай Чудотворецлöн праздник водзвылын, сылöн керкаö мырдöн пырисны куимöн. Грабитысьяс корсисны вичко деньга. Олöма мортöс кувтöдзыс нöйтöм бöрын найö босьтісны кутшöмсюрö эмбур, но сьöмыс эз и сюр. Морт виысьясöс сёрöнджык кутісны да мыждісны. Ставныс найö пукалісны дзескыдінын урчитöм мында и талун абу нин ловъяöсь. А Агафья Егорьевнаöс ми нэмсö кутам казьтывны. Шоныдін да югыдін бур сьöлöма мортлы.
Öнія лунъяс
1992 воын Петыр-Павеллöн вичкоын ыджыдавны владыка Питирим индіс отеч Ионаöс (Скибинöс). Пиыслы отсöг вылö Кулöмдінö Печораысь воисны сылöн бать-мамыс. Тайö семьяыс пуктіс ыджыд пай вичко дзоньталöм-мичмöдöмö.
2003 вося октябрсянь, отеч Ионалöн кувсьöм бöрын, службасö кутісны нуöдны Уллянаса манакъяс. Манастырöн сэки юрнуöдіс отеч Роман (Овсиенко), зэв водзмöстчысь да писькöс морт. Сы отсöгöн вичкоöс могмöдісны колана эмбурöн, небöгъясöн, попъяслы крам праздникъяс дырйи вöччан паськöмöн. Лои дзоньталöма вöскреснöй школалысь стрöйбасö. Роман ай унаысь шыöдчыліс отсöгла Москваö. Сэсянь куим во чöж Кулöмдінö быд вежон воис 8-10 пöсылка-бандероль. Москваса бур сьöлöма йöз отсöгöн сьöмöн дзескыда олысь мыйта семья да челядь вермисны пасьтасьны-кöмасьны, лыддьыны вичко небöгъяс, нимкодясьны козинъясöн!
Ми аттьöалам да бурöн казьтылам став батюшкосö, кодъяс нуöдлісны служба миян вичкоын Иона батюшколöн кувсьöм бöрын: Ефрем (Сатокин), Варфоломей (Потапов), Серафим (Лапиев), Афанасий (Юдин), Димитрий (Мельников), Антоний (Ольшанов) айясöс.
2006 вося сентябрь 10 лунсянь епископ Питиримлöн индöд серти Петыр-Павеллöн вичкоын попöн зільö иерей Александр Антонов. Эскам, ми сыкöд да Ольга матушкакöд öтвылысь вöчам унатор Енмöс славитöм могысь. Öні отеч Александрлöн бласлöвитöмöн мунö "Кулöмдін мувывса вежаинъяс" небöг дасьтöм кузя удж. Книгаас лоö йöзöдöма Эжва йывса вичкояс, сэні служитысьяс, а сідзжö Кулöмдін сиктса вежа ключьяс йылысь юöръяс.
Ми шыöдчам кулöмдінсаяс дорö корöмöн отсавны тайö небöгсö дасьтöмын. Юксьöй миянкöд казьты-лöмъяснад, снимокъяснад, мукöд юöрöн.
Юасьны позьö
8 (82137)94-2-73 да 89048652220 телефонъяс пыр, light_way@bk.ru да popovavalentina@yandex.ru электроннöй пошта пыр. /туввезйын лист бок: www.ust-kulom-hram.ucoz.ru.
Енмыс мед видзас ставнытö!