Кулöмдін сиктын регыд воссяс выль сикас детсад — бать-мам челядьсö кутасны вайлыны сэтчö сöмын час 4-5 кежлö.

Районса администрацияöн веськöдлысьöс вежысь Наталья Левченколöн висьталöм серти, юрсиктысь зэв уна дзолюк детсадйö эз веськавны и налы вылö быть ковмис мыйкö мöвпыштны. Дзоньталісны öти благоустроитöм патера, лöсьöдісны сійöс челядьöс видзöм могысь шогмана выйöдз. Талун садикыс, позьö шуны, дась – коли пуктыны öдзöс. Выльмöдöм стрöйбасö воліс нин донъявны торъя комиссия.

–Тöлысь помöдзыс, кутам лача, детсадсö восьтам нин, – висьталіс Наталья Левченко. – Санитарнöй корöмъяслы стрöйбаыс лöсялö, комиссия лэдзис уджавны сэні челядькöд. 10 морта кык группа чукöртöма жö нин. Öтияс кутасны волыны садйö пажын кадöдз, мöдъясыс – пажын бöрын.
Выльнога уджалан детсадсö лöсьöдісны, медым велöдны дзолюкъясöс овны тшöтшъяяс пöвстын, сетны налы тöдöмлунъяс, дасьтыны школа кежлö да, дерт жö, прöстмöдыштны бать-мамсö. Узьтöдны да гуляйтöдны челядьöс оз кутны. А вердöм кузя абу на помöдз сёрнитчöма – пусян-сёяніныс выль стрöйбаас абу.

–Ми ньöбим термосъяс да сёянсö позяс ваявны орчча детсадйысь. Бать-мам кö оз лоны паныд, кутам челядьöс нöшта и вердны. Мынтысьны кагаöс видзöмысь бать-мам кутасны кыдзи и став садикас – рöскодъяс серти. Кагульничаöс медалöм тайö донас оз пыр – удждон сы-лы вештас муниципалитетса бюджет, сьöмсö та вылö торйöдöма нин, – пасйис Наталья Левченко.

Сылöн кывъяс серти жö, гоз-мöд час кежлö торъя группаяс позяс восьтыны и öнія детсадъясын. Тадзи позяс шымыртны унджык зонпосниöс. А сёрöнджык, 2013 воын, лача кутöны, Кулöмдінын воссяс 120 места вылö выль детсад. Та бöрын юрсиктын кагаöс садйö иналан öчередьыс бырас. Стрöйба улö инсö урчитöма нин, регыд босьтчасны лöсьöдны проектсö.