Öткымын олöма ань вылö видзöдан да, кывйыд оз бергöдчы шуны найöс бабöн. Мый кöть налöн дзормöма юрсиыс, чукырöсь чужöмыс, а ловнас зэв на и томöсь да тэрыб вöрасаöсь. Быдтор на вöчöны, сьыліг-йöктігтыр олöны.
Татшöм жö и Луздор районса Мутничаысь Анна Михайловна Иванова. Паччöр вылад сійö дойсö оз пöж, оз няргы, кöть эськö и ки-кокыс юкалö жö. Анна Михайловна пö-рысьлуныслы оз сетчы, сьылö-йöктö сиктса клубын. А сылы 85 арöс!
Вильыш вöлöма
Анна Михайловна чужлöма Летка дорса Пипсашор пöчинокын. Челядьдырсö сійö нюмсорöн казьтылö. Вичмылöма сылы и сьöкыд удж вöчны да, дерт, и вöлöма кад вильшасьны. Вöрса пöчинокын олігад, позьö шуны, пуяс вылысь абу и лэччывлöмаöсь. Пуысь пуö везъясигад да керка вевтъяс вывті котралігад усьлывлöма и. Коркö öтчыд льöм вотігöн пу вожйыс чегöма да усигас Нюра мöд ув вылö öшйöма.
—Увлань юрöн öшала, ёртъясöй киöд кыскöны-лэдзöны, но оз вермыны, — серамсорöн висьталö баб. —Сэсся платтьööй косясис да коль моз и уси муас. Бур, эг доймы.
Бать-мамыслöн челядьыс вöлöма уна. Анна на пиысь медся ыджыд. Сійö и видзöма ичöтджык чой-воксö. Ачыс на кага, а ковмöма рузум вежлавны, горт гöгöр овны.
—Öтчыд менö бать-мам воштылісны, — висьталö сійö.
—Кытчö?
—Кага видзны колисны, а асьныс удж вылö мунісны, — водзö казьтылö олöма ань. — Локтöмаöсь, а быдтысьысьыд абу. Быдлаысь менö корсьöмаöсь, некöн ог тыдав. И кага бöрдöм пö оз кыв. А ме сэки зыбкаас воді Иван вок дорö да сыкöд тшöтш и унмовссьöма. Рузумöн пö вевттьысьöмныд да он и тыдалöй.
Нинöм пö ог вöч...
Анна Михайловналöн мамыс кадысь водз кувсьöма, кага вайигöн. И кöкъямыс арöса нывкалы ковмöма горт овмöссö кöзяйка пыдди вöдитны. Нюралы медся дыш вöлöма мöс лысьтыны. Пета пö, войтöда да йöв тыра ведраас чужъя, мед киссяс. Сэсся батьыслы вöлöм норасьö, мый мöскыс ачыс чужъясьö, быттьö ичöт мортыдлысь оз кывзысь да. Тадзикöн сійö батьсö мöдысь гöтрасьны ышöдöма.
—Мöдысьсö батьöс ачым и гöтралі, — шуö сійö. —Кöть и ичиньводз олім, том мамыд миянöс бура быдтіс.
Кор заводитчöма война, батьсö первой лунъяссяньыс нуöмаöсь тышкасьны вöрöглы паныд. 1942 воын Аннаöс ыстöмаöсь дас лун кежлö Леткаö велöдчыны град выв пуктас вöдитны. Кык во мысти колхозсяньыс бара ыстöмаöсь велöдчыны Сыктывкарö видз-му овмöс школаö.
Война бöрад олöмыс сьöкыд жö вöлöма. 1954 воын Анна Михайловнаöс индöмаöсь скöт картаö лысьтысьны.
—"Путь коммунизма" колхозöн веськöдлысьыс менö ки пöлöд босьтіс да нуöдіс мöсъяс дорö. Тані пö кутан уджавны. А картаас мöсъясыс вöлі кок йывсьыс усьöмаöсь тшыгъялöмысла. Быть ковмис босьтчыны уджö, кöть эськö ёнасö эг окотит.
Сійö вонас пемöсъяссö идзасöн вердöмаöсь, мукöд кöрымыс абу вöлöма да. Лясниас вöлöм тэчöны идзассö да пöсь ваöн кисьталöны, мед неуна небзьыштас. Став пемöссö Анна Михайловна кок йылас сувтöдöма, некод абу кулöма. Регыд мысти водзмöстчысь да уджач аньöс индöмаöсь Леткаса видз-му овмöсö бригадирöн.
Анна Михайловна шуис, öні пö нинöм ог вöч, а заводитіс лыддьöдлыны да град йöрас зэв унатор на быдтö, гожöмнас керка дорыс дзоридзьясöн тырöма. Водзынсö кысьылöма, но öні синмыс омöльджыка аддзö да оз. Зэв нин, кыдзи ачыс шуö, окота пö лоö да серлöдлöм носки кыа.
—Пöдругакöд эськö джодждöра кöсъям панны да, ог тöд, кор слöймам, — висьталö Анна баб.
Сьöлöмнас том
Анна Михайловна сиктса клубö ветлö сьывны-йöктыны. Сытöг сиктса ни öти гаж оз коль. Мутничаса артистъяслöн котырыс "Ичмоньяс" шусьö. Котырас дас ичмонь. Медся ыджыдыс, дерт, Анна Михайловна. Арлыднас ставнысö панйöма.
Концертасигад уна тешкодьтор овлö.
—Коркö сьылім да, Любовь Андреевна сцена вывсьыс лэччис, — висьталö Михайловна. — Вунöдöма, мый нöшта колö öтиöс сьывны. Сэсся ме горöді, мися, кытчö? А Любовь Андреевна эз шöйöвош да кыдзи тай горöдас сьывны: "Ме гуляйті лун да вой..."
А мöдысь "гастрольöн" ветлöмаöсь матысса Прокопьевка сиктö да лым толаö сибдöмаöсь. Концерт вылад веськавны колö, йöзыс öд виччысьöны. А автобусын сöмын "ичмоньяс" пукалöны. Кодлы йöткавнысö? Ичмоньясыд концертасян сарапаныслысь бöждоръяссö кыпöдöмаöсь да коді зырйöн, коді кокнас лымсö кöлеса увсьыс вешталöмаöсь.
—Перйим автобустö толасьыд! — ёна и нимкодь лоöма аслыныс.
—Ичмоньясыд öд зэв тша-пöсь, баситчыны радейтöны, рöмпöштан водзын дзирнясьöны.
—Ми сэтшöмöсь и эмöсь, — нюмъялö Анна баб.
—Кымын арöсаöн нö асьтö кылан?
—Да, буди, меным кызь кöкъямыс на кö-а!