Анатолий Чиканчиöс бура тöдöны республикаын. Спортсмен. Тренер. Зіль общественник. Но век жö Анатолий Васильевичлöн олöмас буретш спорт босьтö медтöдчана места. Сылы сöмын нелямын арöс, а сы мында ордйысьöм-турнир пыр нин вуджис, перворазрядниксянь спорт кузя международнöй класса мастерöдз быдмис. Да и Россияса заслуженнöй тренерöн нин лоис.
Анатолий Чиканчиöс тöдöны и кыдзи "Школа боевых искусств" регионъяскостса спорт котырöн веськöдлысьöс. Пасъям, Сыктывкарысь öтдор школаыслöн филиалъяс эмöсь öні Москваын, Кировын, Усинскын, Ухтаын. Сöмын миян юркарын Чиканчилöн 600 быдтас велöдчöны вермасьны-тышкасьны. Тшöтш и видлöны ворсны футболöн да нырччöны гимнастикаö...
—Дженьыдика висьтыштöй ас йывсьыныд, спортын медводдза воськовъяс йылысь.
—Чужлі Ухтаын. Сэсся бать-мам вуджисны Вуктылö. Школаын на велöдчигöн котралі дзюдо да самбо кузя секцияö. Зэв окота вöлі тшöтшъяяс пöвстын лоны медвына мортöн. Сюркнялі тренерлысь индöдсö: куж дорйыны асьтö, сэки и пикö воöмалы верман отсавны. Эг эновтчы спортысь и Куратов нима первой номера педколледжын велöдчигöн. Диплом босьтöм бöрын кольччи педколледжö, босьтчи велöдны студентъясöс таэквондоö. Морт кызь кымын чукöрмис, кодъяслы воис сьöлöм вылас выль предметыд. Вит во мысти вуджи Сыктывкарса госуниверситетö, тані бара жö велöді таэквондо. Уджысь орöдчывтöг помалі Удмуртияса госуниверситет, сы бöрын —Коми Республикаса Юралысь бердын госслужба академия. Выль нэмö пыригöн нырччи тренер уджö. Мыйтакö кад зіли Сыктывкарса 5 номера ДЮСШ-ын, сэсся котырті "Мастер" спортклуб. Öні юрнуöда "Школа боевых искусств" котырöн.
—Быдтасъясыдкöд ті тшöкыда ветлывланныд таэквондо кузя Европаса да мирса чемпионатъяс вылö. Да и асьныд öні на тыш-косьысь он бöрыньтчöй. Век медальясöн гортаныд локтанныд...
—Кöть и ветлывла турниръяс вылад öні ёнджыкасö кыдзи тренер, ковёр вылад косясьнытö петавла на. Со кольöм во Лунвыв Кореяын таэквондо кузя мирса чемпионатын шедöдлі бронза медаль. Зарни медаль тайö турнирас босьтіс Алексей Туров. Эзысьöн гортас бергöдчис нöшта öти менам быдтас.
—А мыйта меддона награда асьныд ті босьтлінныд Европаса да мирса чемпионатъясын?
—Кыкысь вöлі таэквондо кузя мирса, сы мындаысь жö — Европаса чемпионöн.
—Кымын жö зарни колö "курыштны", медым тіянлы сетісны спортса заслуженнöй мастерлысь ним?
—Сідзсö мирса чемпионатъясын быть колö босьтны куим зарни. Но мукöддырйи артыштöны спортсменлысь став вермöмсö. Кута лача, мый "заслуженнöйнад" и ме лоа. Öні колана документъяссö ыстöма таэквондолöн федерацияö.
—Ті асланыд быдтасъяскöд ветлöмныд ордйысьны уна странаö — Лунвыв Кореяö, Италияö, мукöдлаö. Кöні медъёнöсь спортсмен-таэквондистъяс: Японияын, Лунвыв Кореяын, Китайын?..
—А вот и эн тöдöй. Медъёна да медöдйö тайö спортыс öні сöвмö Аргентинаын да Австралияын. Тайö кык странаас "висьöны" таэквондоöн уна сюрс морт. Быдöнлы окота лоны Брюс Ли да Джеки Чан кодь жö пелькöн да ёнöн.
—Ордйысигöн, медым воöдчыны финалöдз, кымын спортсменöс колö вермыны?
—Нёль-ö-витöс. Но косясигад уна и пöсь кисьтан. Быд тыш водзын полыштан прöтивниксьыд. Весиг менам оз-оз, да кокöй тіравлö. И век жö колö венны асьтö.
—Пуксис ар. Бара выль турниръяс, выль ордйысьöмъяс. Дасьтысянныд-ö матысса кадö кытчöкö ветлыны?
—Октябрь помын Италияса Наполиын мунас таэквондо кузя Европаса чемпионат да первенство. Ветлам сэтчö сизимöн. Квайт спортсменыс Сыктывкарысь да Эжваысь, öти Усинскысь. Кута лача, и ылі Италияын медальяс миянлы быть югнитасны...