Вильям Вудлöн вужъ-ясыс США-ысь. Овлöма Иллинойс штатын. Служитлöма Вьетнамын, сэсся 33 во уджалöма сварщикöн заводын, кöні вöчöмаöсь тракторъяс да комбайнъяс. А пенсия вылö петöма да 12 во сайын локтöма Россияö. Нёль во олöма Москваын. А коми йöзкöд тöдмасьöм бöрын веськалöма Комиö. Мусмöма Ылі Войвылыс да, кольччöма татчö. Первойсö олöма Кяжпогост районса Йоссер посёлокын, сэсся мунлöма Эжва йывса Дон сиктö, а неважöн ньöбöма керка Гриваысь.
Сиктса войтыр няня-солаöсь, но век жö видзчысьöмöн кутчысьöны мöд кывъя мортыдкöд. Абу-ö пö шпион? Гашкö, лёк морт? Мыйла эз овсьы озыр Америкаас да воис та ылнаö?
—Вильям, кыдзи ті веськалінныд Россияö?
—Вьетнамысь локтöм бöрын ме юси. Сур, виски — быд лун. Удж бöрын мунлі эг гортö, а барö. Понді дурны наркотикъясöн. Öтчыд код юрöн веськалі неминучаö, машинаöн путкыльтчи, и сы бöрын повзи, мый со тадзи кокниа вермас помасьны олöмöй. И кокöй вайöдіс менö вичкоö. А водзті Енлы ме эг эскыв. Пидзöсаси да куті кевмысьны. Аттьöалі Енсö, мый видзис менö, да кори мездыны вина да наркотик гагйысь. Сэсся муні гортö, шыбиті став вина сулеясö да дурмöдчанторсö, тшöтш и куритчанöс. Таöдз 29 во шпутки. Дерт, вöлі зэв сьöкыд, во джын мучитчи. Пытшкöсöй корö вöлі, но эг сетчы. 1991 восянь ме ог ю, ог куритчы, ог вöдитчы дурмöдчанторйöн.
Коркö кывлі радио пыр, мый колöны миссионеръяс, Ен йылысь висьтасьысьяс, а сідзжö висьысьяслы, пöрысь йöзлы, челядьлы отсасьысьяс, кодъяс окотитöны ветлыны 10 лун кежлö Россияö. Босьті отпуск да лэби. И сэксянь быд во отпуск дырйи ветлывлі Роч муö. Тадзи ме некымынысь вöлі Москваын да Ленинградын. А 1997 воын петі пенсия вылö да шуи дзикöдз мунны Россияö. Эновті ассьым керкаöс, сеталі эмбурöс.
Нёль во уджалі миссионерöн Москваса больничаын, кöні куйлöны лёк пыкöсöн висьысьяс. Сьöкыд вöлі аддзыны, кыдзи кулöны йöзыс, торйöн нин челядь. Менам вок да дядь тайö жö висьöмсьыс кувсисны.
А сэсся веськалі Комиö да гöгöрвои, мый тані ме коланаджык. Москваын миссионерыс тырмымöн, сэні, страналöн юркарын, эмджык и сьöм, а Войвылын олысьяс йылысь быттьö вунöдöмаöсь. Найö асьныс зільöны венны сьöкыдлунъяс, но уналöн оз тырмы выныс, сэсся и лэдзчысьöны, юсьöны. А мыйла? Ме зіля медводз вайöдны наöдз, мый олöмас мытшöдъяссö венны позьö, сьöлöмад кö лэдзан Енмöс. Сиктса олöмыс меным матынджык. Ме öд Америкаын 250 морта сиктын жö олі.
Донын ме отсаси сэтчöс йöзлы гортгöгöрса уджын. Öтилы колö вöлі кильчö дзоньтавны, мöдлы пес пилитны, джоджсö вежны... Детсадсаяслы — ворсанін, школаын велöдчысьяслы — спортплощадка. Менам эм сваритчан аппарат, та понда менö тшöкыда корлывлісны Кулöмдін районса мукöд сиктö дзоньтавны трубаяс да вöчны уна мукöдтор. Ог ылöдчы, со снимокъяс. Некор некодлысь сьöм эг босьтлы вöчöм уджысь.
—А мыйла мунінныд Донысь да овмöдчинныд Гриваын?
—Донын колисны менам ёртъяс, найö водзö нуöдöны менсьым уджöс. Лэптöны кевмысян керка. А Гриваö менö Енмыс жö вайöдіс. Ме босьті география карта да, позьö шуны, чуньöн чутки сэтчö. И веськалі Гриваö. Вöлöмкö, тані абу жö вичкоыс. Тайöс некыдз оз позь ошкыны. Но чайта, эскысьясыс эмöсь. Унаöн, кыдзи и Америкаын, нов-лöны перна, а Енлысь велöдöмсö пыдди оз пуктыны. Юöны, матькöны, мисьтöма олöны. Сы понда, мый Енсö сьöлöманыс оз лэдзны. Ме кута висьтасьны налы та йылысь. Енмыс отсаліс меным, а ме кöсъя отсавны мукöдыслы.
—Кыдзи паныдалісны выльлаын?
—Гожöм-арнад сиктса йöзлöн уджыс уна: турун пуктöны, картупель босьтöны. Ог кöсйы найöс уджысь манитны. Но кодсюрö волісны нин тöдмасьны. Кодöс тöда, зэв вежавидзысь да зіль войтыр. Отсалісны вöчны пач, гöрны öшинювса му. Вочасöн и мукöдыскöд тöдмася. Мед корöны, отсала. И меысь мед оз повны, ме абу шпион.