Кöрткерöс районса Висерын узьöм ни олöм. Бöръя кадö тшынйыв кайö стрöйба бöрся стрöйба. Узьны водтöдзыс йöзыс видзöдалöны керка гöгöрсö, оз-ö кыткö тшынась. Тшöтш и войнас чеччылöны овмöссö кытшовтны.
Ускöттьö бöрся ускöттьö
Тавося гожöмын Висерын нёль ускöттьö нин вöлі. Куим стрöйба тшынйыв кайис. Май шöрын сотчöма больничалöн важ песласяніныс. Сійöн эськö эз нин вöдитчыны, но век жö ускöттьöысь шог.
—Мыйла кöть эз пескö пилитны? Том йöзыс сэтчö тшöкыда вöлі чукöртчылöны сур юны. Гажа юрнад куритчöны. Та вöсна, гашкö, и ыпнитіс, — висьталіс Висерса öти мужичöй (ним-овсö газетö йöзöдны эз тшöкты).
Июль 5 лунö дзоньнас сотчис и сиктса детсад. öні зонпосни öшинь улас котралöны, а öд велöдчан во заводитчас да, тöдöмлунъяссö налы босьтны, школа кежлö дасьтысьны лоö некöн.
—Менам аслам внук быдмö. Кытчö сійöс иналасны бать-мамыс? Типöсиктö? Сэтчöдз дас нёль верст, да и ю сайын. Кöть эськö мед школасьыс пельöс вичмöдасны, — майшасьö мужичöй.
А со июль 22 лунся пекничаö водз асылö Висерын вöлöма нöшта кык öзйылöм. Куим час бöрас Ивашевъясöс пальöдöмаöсь: "Чеччöй, турун сарайныд тшынасьö!" Олöма йöз арлыд вылö видзöдтöг повзьöмвывсьыд öдйö и чепöсйöмаöсь. Вöлöмкö, гидыс тшынасьö.
—Сэтчö ме турун сюявлі. Гидас ни би абу нюжöдöма, ни пемöс ог видзöй, — висьталö Валерий Анатольевич. —Гид стенмыс нин вöлі сьöдасьöма. öдйö эськö и кусöді. Бöчкаын вöлі ва да кисьталі. Сэсся видзöда да, Лунь Васьлöн керкаыс сотчö. Шиперыс нин трачкöдчö. Гöтырöй сэтчö котöртіс, а ме видзöдалі на гидöс, оз-ö кыткö водзö тшынась.
Ивашевъясöс Енмыс видзис. Габовъяслöн жö мый ыджда шог лои. Биын ловъявывсьыс сотчисны дас вит арöса Люба внучкаыс да сылöн Катя пöдругаыс. Нывкаяс волöмаöсь шойччыны, а ковмис нэм кежлö мöдаръ-югыдö мунны...
Габов гозъя асьныс öдва жö удитöмаöсь ыпъялысь керкасьыс ловйöнсö петны. öтиыс узьлан дöрöм кежсьыс, а мöдыс улыс гач кежсьыс гöбöч öдзöсöдыс чепöсйöмаöсь. Слöймöмаöсь кватитны куим арöса внуксö, коді на ордын жö гöститöма. Нывкаяс жö узьöмаöсь мудöгын. Коньöръясöй, абу и вермöмаöсь петнысö...
Лоöмторсö öні туялöны. Но помшуöмыс абу на. Кöрткерöсса следовательяслöн висьталöм серти, Габовъяслöн керкаыс вермöма ыпнитны кусöдтöм чигарка помысь. Кыдзи висьталіс Кöрткерöс районысь следственнöй отделöн веськöдлысь Дмитрий Рычков, иын сотчöм нывъяслöн бать-мамыс эскöдöны, мый найö эз куритчывны. Но тшöтшъяясыс висьталöмаöсь, мый нывъяс гусьöникöн пестывлöмаöсь нин чигаркатö. Дерт, следовательяс видлалöны ускöттьöлысь и мöд помка — эз-ö кöдкö тöдöмöн öзты.
Узьöм ни олöм
Сиктын жö збыльысь ставныс шызьöмаöсь. Йöзыс оз эскыны, мый Ивашевъяслöн гидас туруныс öзйис шона-лöмысь. Кöть эськö пö и овлö, мый ульджык туруныс тшынасьлö. Габовъяслöн жö керкаыс тшöтш ыпнитöма гидсяньыс. А нывкаясыс сэтчö лэччылісны куритчынысö? А сэсся бöр кайисны мудöгö? Вонъяс кö тшынасисны, дед-бабыс эськö эз жö и казявны.
Öні висерсаяслöн сöмын дöрöмыс узьö, быдторйысь ырс палялöны. А кыдзи нö сотчöмсьыд он пов? Биыд öд абу гусясьысьыд. Кузь киаыд керкасьыд оз на став эмбуртö петкöд. А биыд оз жалит, кушöдз нюлыштас.
—Понйöй эм да сы вылö надейтча, — висьталö Висерын öти олысь. — Тöдтöмтö, керка дорö кö матыстчас, чайта, шыалас. Дзик узьтöг öд он жö сэсся ов, коркö и личкылас унмыд.
Коді мыжа?
Висерын олысьяс кызвыныс чайтöны, мый кодкö пакöститчö. Нёль öзйылöм регыдъя кадö! Эм мыйысь повны. Сэсся и сёрнитöны, мый сиктас олöны кык öзтасьысь. öтиыс пö весиг ассьыс керкасö нин "пестылöма". Да и кор Ивашевъясöс чуксалöмаöсь, аддзылöмаöсь сиктас шöйтысь мортöс. Чужöмсö вевттьöмöн мунöма Габовъяслöн керкалань. А сэсся регыд мысти керкаыс ыпнитöма...
Кывсьö, Висерысь тайö шуштöм асъя войнас аддзылöмаöсь и тöдтöм машина. Габовъяслöн пиыс асшöр уджалысь — карын кыпöдö пуысь керкаяс, пывсянъяс. Йöзлöн висьталöм серти, гашкö пö, кодöскö "кöмöдіс", со и водзöсалісны. Во кык сайын Висерысь сылысь пилитчанінсö сотлöмаöсь нин.
Кöш ваöн битö он кусöд
Казьтыштам, мый вöсна сотчис Габовъяслöн овмöсыс, öні туялöны Кöрткерöс районса следовательяс. Но сиктсаясöс тайö некутшöма оз лöньöд. Висерсаяс полöны выль неминучаысь. Сиктас öд весиг участкöвöйыс абу. Волывлö орчча Одыбысь, 26 верст сайсянь. Таво сы вылö жö "öшöдöмаöсь" ставнас Висер вожсö.
Абу сиктас и кусöдчан машина. Водзынсö эськö совхозлöн машинаыс вöлöма, но öні сійö оз уджав. Ускöт-тьöяс дырйи кусöдчыны волöны Одыбсянь, Шойнатысянь да Кöрткерöссянь. Висерын эськö эм ва резан бак, кодöс кыскалö "Беларусь" трактор. Но сэтчö ваыс тöрö этша, а ыджыд пöжартö кöш ваöн он кусöд.
Кыдзи висьталіс Висер сиктса администрацияöн веськöдлысь Анна Попова, таво гожöмнас Висерын, Типöсиктын, Сюзяыбын вöлöма нин кöкъямыс öзйылöм. Нёль стрöйба кушöдз сотчöма.
—Сиктын эм и квайт кусöдчан юкмöс. Гожöмнад пöжар дырйи ваысла лэччылöны и Висер юöдз, — висьталö Анна Андреевна. — Регыд татчö восьтам кусöдчан юкöн. Уджалысьяссö аддзим нин, квайтöс медалім. Кольöм вежонö став колана кабаласö дасьтім нин да ыстім карö. Эскам, мый таво сиктын кусöдчан депоыс лоö нин.