Быд во декабрь тöлысьö юркарын мунö Кулöмдін районса землячестволöн конференция. Чукöртчысьяс бöрйöны öтмунöмöн веськöдлысьöс да сöвет, вынсьöдöны локтан во вылö уджтас. Кыдзи землячество уджалö-олö да кодлы налöн зільöмыс колö? Тайö да мукöд юалöмöн миян журналист Григорий Хатанзейский шыöдчис котырса выльöн бöрйöм веськöдлысь Иван Михайлович Шахов дорö.
—Иван Михайлович, медводз вай уськöдам тöд вылö, кор чужис Кулöмдінса землячество?
—Землячестволысь чужан лунсö ми пасъям декабрь шöрын. 1998 воын буретш декабрь 14 лунö юркарын Виктор Савин нима драма театрын чукöртчылісны Кулöмдін районысь петлöм войтыр — найö, кодъяс нимкодьпырысь казьтылісны ичöт чужан мусö да окотитöны вöлі кутны сыкöд топыд йитöд.
—А коді вöлі землячестволы подув пуктысьнас? Коді ышöдіс öтувтчыны юркарын олысь Эжва йывса войтырöс?
—Тайö зільöмсьыс колö аттьöавны котырöн медводдза веськöдлысь А.А.Липинöс, М.К.Игнатовöс, А.Д. Тюрнинöс, А.М.Игнатоваöс, Н.В.Давлетоваöс, Д.Г.Холоповаöс... Ставнысö лыддьöдлыны, дерт, оз артмы, но быдöнлы, кодöс эг казьтышт, муöдз копыр.
—Кывлі, Кулöмдінса землячество Сыктывкарын медуна лыдаяс пиысь. А збыль кö, ыджыд-ö талун котырныд?
—Кык сюрс мортыд лоö. Öткымын гаж дырйи витсё мортöдз чукöрмывлам. Сэки лолыд прамöя кыпавлö — мыйтаöн ми! А кöні уна, сэн и вына. Сідзкö, ми унатор на сяммам вöчны Кулöмдін районын да Коми Республикаын олöмсö сöвмöдöм-бурмöдöм могысь.
—Татшöм уна йöзнад öткöн веськöдлыны абу кокни. Тэнад эмöсь отсасьысьяс?
—Да. Землячестволöн эм сöвет, сэтчö пырö 13 морт. Быдöн на пиысь кывкутö кутшöмкö торъя тöжд-мог вöсна. Ставныс зэв водзмöстчысь войтыр, та вöсна веськöдлынысö меным тöдчымöн кокниджык. Дженьыда кö, эм код вылö мыджсьыны, юксьыны аслам тöжд-могъясöн, колана здукö виччысьны отсöг.
—Кутшöм могъяс ті сувтöдлінныд ас водзаныд землячество котыртігöн?
—Öти-кö, юркарын олысь Кулöмдін районса войтырöс öтувтöм. Мöд-кö, дерт, ассьыным район сöвмöдöм. Ми окотапырысь отсасям Кулöмдінса войтырлы да сэтчöс социальнöй учреждениеяслы. Нуöдам ветеранъяскöд, том йöзкöд торъя удж. Кыдз шуласны, сос пуджöмöн тышкасям сикт-грездъясын кодалöмлы паныд. Сэсся öд ку-лöмдінсаяс сьывны-йöктыны радейтысь йöз, землячест-волöн сöвет котыртлö-нуöдö вель уна гаж…
—Иван Михайлович, а стöчджыка кö, кутшöм отсöг вичмöданныд Кулöмдін районлы?
—Сідз, 2001 воын миян землячестволöн сöвет да "Коми войтыр" öтмунöмлöн исполком котыртлісны Канава грездö экологическöй экспедиция. Сэки сэні нуöдісны мусир перйöм кузя уджъяс. Бурöвöйсö кытшовтігöн ми ас синмöн сюся видзöдім, кыдзи писькöдчöны сэні, оз-ö тшыкöдны вöр-васö.
Некымын во сайын, сэки Госсöветса депутат на А.С.Безносиковлöн да районса юралысь С.П.Каплинлöн водзмöстчöмöн вöлі нюжöдöма Пузласянь Ухтаöдз би сетан высоковольтнöй линия, вöчöма Нем да Прупт юяс вомöн посъяс.
И татшöм гырысь проектъяссö позьö лыддьöдлыны уна на.
—Тэ гаравлін тшöтш и торъя йöзлы отсасьöм йылысь…
—Ми могмöдам сикт-грездъясын олысьясöс кöлуй-паськöмöн, небöгъясöн. Нималана врач-нарколог А.Д.Подоров вонас некымынысь ветлывлö Кулöмдін районö, медым дугöдны кодсюрööс вина юöмысь. Колö пасйыны, öнія кадö тайö зэв колана уджсö котыртöма сöмын миян землячествоын.
Сэсся оз ков вунöдны на йылысь, кодъяс козьналісны миянлы талунъя мирнöй, судзсяна олöмсö. Быд во Победа лун водзвылын Кулöмдінса землячество чолöмалö войнаса да уджвывса ветеранъясöс, дасьтö налы бур козинъяс. 2006 восянь ми тшöтш збыльмöдам "Георгиевскöй ленточка" федеральнöй проект. Землячестволöн сöветö пырысь Ф.Г.Кармановлöн водзмöстчöмöн Немдінын сувтöдісны Советскöй Союзса Герой Георгий Тимушевлы памятник.
—Том йöзкöд кыдзи уджаланныд?
—Талун юркарын пединститутын велöдчö Кулöмдін районысь матö кыксё ныв-зон, куимсё гöгöр — Сыктывкарса госуниверситетын, нелямынöн — КР-са Юралысь бердын искусствояс гимназияын. Лыдпасъяс серти, миян том йöзыс тані вель уна. Дерт, накöд кутам топыд йитöд. Котыртлам аддзысьлöмъяс, ышöдам найöс пырöдчыны землячествоö. Колö пасйыны, том войтыр окотапырысь босьтчöны миянкöд öтувъя уджö. Кыдз шуласны, чукöст сöмын, котöрöн воасны. На пöвстын вель уна енбиаыс: сьылысьяс, йöктысьяс, серпасасьысьяс, гижысьяс. Миян мог — аддзыны татшöмъяссö да отсавны налы водзö сöвмöдны талантнысö. На сайын öд миян коми культуралöн аскиа луныс!
—Оз ло син восьтöм, шуа кö, мый буретш тіян районын чужис медуна творческöй йöз. Кодсюрö весигтö шмонитöны, Кулöмдінын пö быд керкаын олö сьылысь либö поэт. Землячествоаныд талантаясыс кыдзкö öтувтчöмаöсь жö?
—Миян эм "Эжва катыд" хор да "Медбур кад" вокальнöй котыр. Дас куим вонас сьылысь-йöктысьяс пет-кöдчылісны ыджыд сцена вылын этша вылö кыксёысь нин. Кытшовтісны республикасö ставнас, весигтö Кировö ветлісны. Веськöдлысьясыс — зэв мелі, шань сьöлöма аньяс Зинаида Пупышева да Вера Булышева.
—Быд землячестволöн эм мыйöнкö ошйысянтор, роч ногöн, бренд. Тіян татшöмыс эм жö?
—Воысь-во юркарын ми пасъям коми сиктлысь лун. Могыс — петкöдлыны миян районса сійö либö мöд сиктлысь да грездлысь оласногсö, аслыспöлöслунсö. Тадзикöн ми нимöдім нин Пожöг, Помöсдін, Югыдъяг, Ку-лöмдін, Керчомъя, Зимстан. Таво март 20 лунö И.Куратов нима педколледжын шуим тöдмöдны Сыктывкарса олысьясöс Дереваннöй сикткöд. Корам волыны! Лоас зэв гажа!
—Водзö вылö кö землячестволöн дум-кöсйöмъяс йылысь сёрнитны...
—Апрельын шуим ветлыны социальнöй десантöн Скöрöдум да Пожöг сиктъясö. Петкöдлам концерт, вичмöдам сэтчöссалы колана отсöг. Зэв эськö окота, медым "Эжва катыд" хор лоис народнöйöн.
—Иван Михайлович, землячествоöн юрнуöдöм кындзи тэ зілян аслад бизнесын. Абу сьöкыд вöчны тайö кык ыджыд уджсö?
—Ме тадзи вочавидза: кöсйöмыд кö эм, ставыс артмас.
—Аттьö тэныд кыпыд лола сёрниысь! Сиа сöмын öтитор: медым тайö кöсйöмыс некор оз быр!
