Тавося январь 28 лунö мойвиис волыны коми йöзлöн чукöртчылöм вылö, кодöс вöлі сиöма вужвойтырлöн медводдза съездсянь 20 во тырöмлы. Менö, прöстöй коми мортöс, сійö нинöмö эз ышöд. Сöмын пыдісянь ышловзи. Мый понда, лыддьысьысь гöгöрвоас водзö гижöдысь.
Конференция бöрас вöлі "гöгрöс пызан", кöні позис юксьыны коми съездъяслöн вермöмъяс да öнія мытшöдъяс кузя мöвпъясöн. Вöлі пасйöма, мый 21 во сайын котыртчöм "Коми котырлы" (лыддя 1989 воын Ухтаын, юркарын, Изьваын да Печораын лöсьöдöмсянь) удайтчис шызьöдны эз сöмын Коми муын олысьясöс, но и став мирсö — 2 воöн лöсьöдöма став финн-йöгра войтырлысь öтмунöм. И сыысь, мый ООН-са Генеральнöй ассамблея вынсьöдіс 2007 воын "Вужвойтырлöн правояс йылысь декларация", кодöс колö пыдди пуктыны быд государстволы, эм пайыс и öтмунöмлöн.
Миян республикаын вермöмъяс йылысь "Коми му" газет гижліс нин февраль 3 лунö. "Гöгрöс пызан" сайын унджык сёрнитысьыс пасйис, мый съездъяслöн вöзйöмъясысь зэв унатор сідз эз и артмы пöртны олöмö, торйöн нин социальнöй юкöнын да экономикаын, и мый бöръя воясö ми кутім воштыны весиг коми кыв, йöзöс велöдöм да культура кузя воддза вермöмъяссö. Власьт кутысьяс съезд-конференцияяс вылын ошйысьлöны ыджыд удж вöчöмöн. А збыль вылас коді нö бырöдіс Коми небöг лэдзанінсö? Коді нö пыртіс вежсьöмъяс оланпасъясö да коми кыв велöдöмыс бара на лои ковтöмöн? Мыйла сиктса унджык том войтырлы школа помалöм бöрын абу позянлун водзö велöдчыны-уджавны? И татшöм юалöмыс зэв уна...
Сёрни кыптыліс и сы йылысь, мый правительствоын да депутатъяс пöвстын лыда морт тöдö коми кывсö. Та кузя письмöасигöн профессор Евгений Игушев меным гижліс, мый Рытыввывса специалистъяс тшöкыда весиг оз гöгöрвоны татшöмторсö. Сёрнитысьяс эз прöстö индыны, мый правительстволöн "Стратегия-2020"-ын пöшти нинöм абу шуöма коми войтыр кузя. Сэні нинöм эз висьтавны и Финляндиялысь да Канадалысь опытсö босьтöм йылысь. Таво, дерт, паськыда кутасны нимöдны республикалы 90 во тырöмсö. Кодöс сöмын кутасны ошкыны-ыдждöдлыны-а? Видзöдлыны кö республикалысь Оланподувсö, сы серти ми ас му вылын абу вужвойтыр. Веськыда кö шуны, большевик-ленинечьяс Батиев, Маегов, Савин да унаöн мукöд, кодъяслöн зі-льöмöн и артмис миян государственносьтыс да кодъяслы унатор эз удайтчы вöчны асланыс кöсйöмъяс серти, веськавлісны, Ленинлöн кывъясöн кö, "великодержавнöй роч шовинизмлöн" мöлöт улö. И "гöгрöс пызан" сайын некымынöн эз прöстö шуны, мый "Коми войтырын" водзмöстчысьлы уджсö колö нуöдны, рочöн кö, мудрöя да гибкöя. Ме жö аддза — сійö "мöлöтыс" уджалö и öні, сöмын мöд ног. Босьтам телевидение. Вежончöжся теле-радиопередачаясын комиыс лыда. 1991 воын ме вöлі Уфаын, 1999-ын — Казаньын. Сэні та кузя серпасыс дзик мöд. А тшöтш öд Москва борд улынöсь. Сідзкö, тайö да мукöдтор кузя унатор республикаса чиновникъяс сайын.
Босьтам мöдтор — бöрйысьöм. Локтöм чина йöзыд комисö унаöс-ö лэдзöны депутатö? Аддза, найö сьöм ни вын оз жалитны, мед водзмöстчысь коми морт эз веськав депутатад. Во 15 сайын тадз лои Ухтаса "Коми котырысь" нырщик Яраповкöд, 8 во сайын мекöд, а Изьваын кыдз вöлі?.. Торйöн нин забеднö, кор ас синмöн аддзан, мый и вель уна коми морт гöлöсуйтö сьöм да быдсяматор кöсйöм ради локтöм йöз вöсна. Забеднö абу ас понда, а сы вöсна, мый тадзи гöлöсуйтöмнад да уна мукöдтор вылö веськодя видзöдöмнад ми воштам ас му вылысь ог сöмын озырлунъяссö, но и асьнымöс. Коми войтырлöн I съезд вылын на отеч Василий шуліс, мый Енмыс быд войтырлы вичмöдіс му да вöр-ва угоддьöяс, медым видзны-дöзьöритны найöс. Ен серти-ö ми вöчам? Кулöмдінысь Русинова кыпöдіс сёрни, мый совхозъяс кисьтöм бöрын дзикöдз кусіс олöмыс сикт-грездъясын, а öні кутіс кусны и посёлокъясын "Монди СЛПК"-лöн политика вöсна. Кöсйöны пö субарендаö сетны ассьыныс вöр участокъяссö, а техникасö вузавны йöзлы, а мый нö вöчны посёлокъясын олысьяслы? А ме та кузя тадз мöвпала.
Оланпас серти быд выль уджö босьтчöм, кыдзи и вöр-ва угоддьöяс кодлыкö арендаö сетöм кузя нуöдсьö сідз шусяна общественнöй слушание. Ми Ухтаын 8 во нин "воюйтам" Керки бокын сёя му вöчан завод стрöитöм кузя, и эг лэдзöй сетны кодлыкö арендаö 50 сюрс гöгöр гектар угоддьö, "общественнöй слушаниеяс" дырйи, шуим "Газпромлы" труба нуöдöм кузя ассьыным кыв. Артмö, Кулöмдін да мукöд районын татшöм чукöртчылöм вылас йöзыс оз волыны? И лöня сетöны позянлун вöчны ставсö сідз, кыдз кöсйö бокысь воöм барин? Либö жö республикаса да районса чиновникъяслы абу окота уджавны йöзкöд да "слушаниеясыс" нуöдсьöны бумага вылын либö ылöсас? Кыдз аддзанныд, тайö вывті тöдчанатор, огö кö кутöй дорйыны ассьыным правояс, 49 во кежлö вöр-ва угоддьöыд лоас кутшöмкö "дядьöяс" киын нин, и нинöм сэсся он веж. Та боксянь и правительствоса чиновникъяслы колö думайтöмöн ставсö вöчны, медводз йöз да вöр-ва йывсьыс мöвпалöмöн. Эз прöста Ухтаысь Ярапов шу, вай пö думыштламöй, мый Коми муас коляс во 50 мысти да öткодялам Африкакöд. Сэтысь капиталистъяс озырлунтö нуисны, а кыдзи сэні йöзыс олöны? Миянлысь пöчöн-пöльöн шуысьясöс виччысьö лёкджыктор на — öд тані Африкаад моз нинöм оз быдмы. И вöзйис локтан съезд кежлö дасьтысьны бура да быд боксянь. Талун та могысь эм отсöгыс — ООН-са Генеральнöй ассамблеяöн вынсьöдöм "Вужвойтырлöн правояс йылысь декларация".
"Гöгрöс пызан" сайын сёрнитысьяс унатор на вöзйисны исполкомлы водзö удж кузяыс. Ме сідзжö корлі кыв да висьталі ассьым мöвпъясöс.
—Мыйла ми тшöкыда асьным асьнымöс ог пыдди пуктöй? Абу-ö помкаыс сыын, мый историкъяслöн кывкöртöд серти, весиг школаса учебникын пасйöма, быттьöкö кыдз племена, ми артмим миян эраса I сюрс волöн мöд джынъяс, мый рочьяс миянлы вайисны культура, велöдісны миянöс бурджык керкаяс вöчны, вöдитчыны муöн да с.в. Кор ме став мувывса финн-йöгралöн V конгресс бöрын куті пырöдчыны миян важ олöмö, то аддзи, мый татшöм гижöдыс абу сöмын ылöдчöм, а петкöдлö комиясöс некытчö путьмытöм йöзöн. Сідзкö, тадзи жö петкöдлöны миянöс Россияса политикъяслы, роч да мукöд сёрниа йöзлы. А ми воча кыв ог шуöй, сы вöсна мый öткымын историкöн тадз гижöма — "чёрным по белому". Кад нин тайö ылöдчöмыслы пуктыны пом да лöсьöдны коми йöзлысь збыль историясö. Весиг Карамзинлысь да Ключевскийлысь веськыдджык подувсö позьö аддзыны, ог нин шу белорус Савицкий кузя, коді гижис: "К счастью этноисторической науки, в северо-восточной части Европы всё ж сохранились малочисленные потомки этих древних, некогда многочисленных неолитических финно-комиязычных племен в лице современных коми, коми-пермяков и удмуртов..." ("древний" кывйыс историографияын петкöдлö миян эраöдз олöм кад). Збыль история серти колö кыпöдны коми йöзлысь аскылöмсö (самосознаниесö) — татшöм кывкöртöд вöчисны унаöн.
—Россияса став финн-йöгра котырлы колö öтвылысь зільны, мед миян национальнöй субъектъяслöн Конституцияясын вöлі гижöма, мый финн-йöгра да самодиечьяс — асланыс му вылын кöзяева, вужвойтыр, и мед та подув вылын вöлі пыртöма оланпасъясö вежсьöмъяс "Вужвойтырлöн правояс йылысь декларация" тöд вылын кутöмöн. Кытчöдз тайöс оз ло вöчöма — сьöкыд дорйыны асьнымöс, сы вöсна мый талунъя законъяс серти комилöн правоыс мукöд национальносьта йöзкöд öткодь. А веськыда кö шуны, немечьяслöн правоыс весиг унджык. 2010 вося декабрь 27 лунö Президент бердын Госсöветлöн чукöртчылігöн В.Басаргин шуис, Россияын пö национальносьтъяс кузя эм сöмын кык уджтас — этша лыда вужвойтыр кузя, мый вылö вичмöдöма зэв ичöтик сьöм, да роч немечьяслы отсалöм могысь.
Став мувывса финн-йöг-ралöн V конгресс вылын уна делегат шуліс, мый талунъя Россияса власьтлöн абу на-циональнöй политикаыс, а тайö вермас вайöдны зэв ыджыд лёкторйö. Но талун национальнöй политикаын кутшöмкö вежсьöмъяс оз на тыдавны. Сідзкö, коми йöзлы, кыдз и 21 во сайын, бара на ковмас водзмöстчыны локтан съезд вылын.
