Валентина Васильевна Бараксанова вит во нин веськöдлö Сыктывдін районысь Выльгорт сиктса администрацияöн. Тайö каднас лоис аслас ыджыд овмöсын бур кöзяйкаöн, велöдчис уджавны йöзкöд. А кывкутны сылы колö и биöн, шоныдöн да ваöн могмöдöм, и сикт пелькöдöм-мичмöдöм, и туйяс дзоньталöм, и олöма войтырлысь олöмсö кокньöдöм вöсна. Лоö аддзысьлыны уна йöзкöд. Администрацияöн веськöдлысьлöн быдлунъя кывкутана удж йылысь и пансис сыкöд аддзысьлігöн сёрниыс.

—Валентина Васильевна, кыдзи нывбаба вермö босьтны аслас пельпомъяс вылö быдса ыджыд сиктлысь тöжд-могъяссö?

—Сідзи нин артмис, мый Сыктывдін районын сизим сиктса администрацияöн юрнуöдöны аньяс. Гашкö, тадзи кадыс тшöктö. Öд нывбаба пыр вöлі кöзяйкаöн, буретш сійö кывкутö гортын пöрадок вöсна. А сикт — тайö миян öтувъя ыджыд горт. Кöзяйка кö став уджсö бура вöчас, сійöс сöмын аттьöалöны. Висьтавны кö ас йылысь, меным тайö уджыс воö сьöлöм вылö.

Кор 2006 воын лои администрацияса юралысьöн, чайті, мый ставыс артмас кокниа. А öні гöгöрвои, мый тайö уджыс абу кокни. Эз быдтор артмы. Но талун унаторйö нин велалі, гöгöрвоа экономика, сиктса йöзлысь тöжд-майшасьöмъяссö, со и зумыда видзöда аскиа лунö.

Ыджыд аттьö кöсъя висьтавны администрацияса специалистъяслы, кодъяс медводдзасяньыс зілисны отсавны меным. Кокни уджавны татшöм йöзыскöд. Миян котырын 17 морт. Ставöн сьöлöмсянь пöртöны олöмö ассьыныс могъяссö.

Сідз, кольöм вося августын миян кипод улö сетісны Выльгорт сиктын став оланінсö. Öнісянь миянлы ковмас сідзжö кывкутны и сикт пыр мунысь республикаса тöдчанлуна туйяс вöсна. Уджыс ёна содіс. Позис эськö босьтны содтöд специалистъясöс. Но администрациялöн сьöмыс та вылö оз тырмы. Сідзкö, быдöнлы ковмас воддза серти зіль-джыка уджавны. Чайтам, миян ставыс артмас.

—Мый тшöт весьтö олö сиктыс?

—Бергöдчам вотъяс весь-тö. Миян бюджетлöн ыдж-ыдджык юкöныс мунö сикт пелькöдöм, туйяс бурмöдöм да видзöм вылö. 2006 воын шуим выльысь югзьöдны уличаяс. Электролинияяс ёна важмисны. Сиктса уна улича вылын вöлі пемыд. Ко-льöм вит воöн электролинияяс выльмöдöм вылö асла-ным бюджетысь видзим вит миллион шайт. Но уджъяссö помалöм могысь колö на этша вылö нёль миллион гöгöр.

Öні ас водзö сувтöдім выль мог. Лöсьöдім "Югыд Выльгорт" уджтас, кодöс петкöдлім энергия видзтан Коми Республикаса шöринын. Тайö программаыслöн медшöр могыс — энергия видзтан лампаясöн вöдитчыны да ас бюджетысь сьöмсö бурджыка видзны. Талун уличаяс югзьöдöм вылö казнаысь мунö вонас 1200-1300 сюрс шайт. А энергия видзтан лампаяс отсöгöн миянлы вонас позяс рöскодсö чинтыны 700 сюрс шайт вылö. Миянлысь уджтаснымöс кö вынсьöдасны да пыртасны республикаса программаö, став видзтöм сьöмсö сэки вичмöдам мукöд электролинияяс выльмöдöм вылö.

Администрация ёна тöждысьö и сикт мичмöдöм-пелькöдöм вöсна. Выльгорт — Сыктывдін районлöн чужöмбаныс. Сэні пыр уна гöсьт и миян республикаысь, и бокысь. Та вöсна миянлы пыр колö вылын кутны юрнымöс. Сэк жö Выльгортын уна ветлысь-мунысьыс. Öти-яс олöны сиктын, но уджалöны карын. Мöдъяс олöны карын, а зільöны Выльгортын. Та вöсна öткымынлöн на пиысь чужö сикт дорö веськодьлун. Дыр эг вермöй мынтöдчыны ёг шыбласъ-ясысь, торйöн нин уна вöлі татшöмыс ас керкаяс дорын. Сэсся администрация тшöк-тіс ас керкаын олысьясöс мынтысьны ёг идралысьяслы налöн уджысь. Но унаöн сувтісны талы паныд. Шензьöдö, мый торъя йöз оз кöсйыны кывкутны асланыс чужанінын пöрадок вöсна. Та кузя миянлы ёна на ковмас уджавны.

Администрация öні кутö син улын и сиктса уличаяс да уличкостъяс. Налöн кузьтаыс 43 километр. Уна кад воштім уличаяс весалöм могысь ас транспортöн вöдит-чысьясöс корсигöн. Найö вермисны эськö вöчны тайö уджсö тöвнас. Вочасöн тайö майшасьöмсö лои бырöдöма.

Водзтіджык сьöм абутöм вöсна уна во чöж эз дзоньтавлыны туйяс. А сэсся сиктö локтісны биару труба нюжöдысьяс. Öти боксянь кö, бур, мый миян войтыр сідзжö кутасны вöдитчыны биаруöн. Но мöдар боксянь, налöн сьöкыд машинаясыс нöшта нин жуглöны миянлысь омöль туйяснымöс. Кык во сиктын ноксис "Газремонт" ООО. Декабрын сійö помаліс ассьыс уджсö да колис миянлы жуглöм туйяс. Кöть эськö биару труба нюжöдысьяс кöсйысисны дзоньтавны найöс локтан тулыснас да гожöмнас. Миянлы кольö сöмын эскыны да виччысьны.

А öд туйяс дзоньтавнысö дона. Сідз, би кусöдысьяслöн кантора дорын некымын дас во нин дзоньтавтöм туйлöн юкöн, коді йитö сиктлöн гöравывса олысьясöс паськыд туйкöд. Лым сылігöн да зэригöн сэтчö чукöрмö уна ва, коді жуглö асфальтсö. Специалистъяслöн арталöм серти, 42 метр дзоньталöм могысь ковмас 3 миллион 300 сюрс шайт. Администрациялöн та мында сьöмыс абу. Миянлы ковмис шыöдчыны Коми Республикаса правительствоö да туй агентствоö. Бöръясяньыс юöртісны, мый тайö туй вöснаыс колö кывкутны сиктса администрациялы. Но ми нинöм ог вермöй вöчны. Со и кольöм вося декабрын ме шыöдчи та кузя Коми Республикаса Юралысьöс первой вежысь А.Л.Чернов дінö, коді тшöктіс дасьтыны документъяс. Окота эскыны, мый республикаса власьтъяс век жö отсаласны миянлы.

—Кутшöм йитöдъяс кутö администрация татчöс предпринимательяскöд?

—Социальнöй юкöнын уджалігöн на менам чужис попечительяслысь сöвет лö-сьöдöм йылысь мöвп. Сійöс и збыльмöді тайö удж вылас. 2006 воын миянлысь бюджетнымöс эз вöв стöча лöсьöдöма. Сьöмыс та вöсна оз вöлі тырмы весиг удждон вылö. Сэки и лöсяліс попечительяслöн сöветыд. Предпринимательяс А.Н.Ватаманова, М.Э.Захаров, И.Г.Палькевич, Н.И.Провст да мукöд отсалісны збыльмöдны миянлысь уна бур кöсйöм. Но кадыс вежсьö. И ми öні ог нин важ моз пычкöй налысь сьöм. Но тайö войтырыс ассьыныс позянлунъяссö артыштöмöн пыр мыйöнкö да мыйöнкö зільöны отсавны миянлы.

—Сідзкö, сиктса олöмын сьöкыдлунъяссö тіянлы удайтчö венны?

—Зілям венны, кöть эськö и збыльысь сьöкыд овлывлö.