Кольöм пекничаö Коми войтырлöн медводдза чукöртчылöмсянь 20 во тырöмлы сиöм конференция вылö волісны Коми Республикаса Юралысь Вячеслав Гайзер, Госсöветöн веськöдлысь Марина Истиховская, Комиысь быд кар-районса "Коми войтыр" öтмунöмын водзмöстчысьяс, Мордовияысь да Перым-Коми кытшысь гöсьтъяс. Тшупöда пасöн чолöмалана кывъяс ыстöмаöсь "Финляндия–Россия", Удмуртияысь "Удмурт кенеш", Эстонияысь "Фенноугрия", Карелияысь карелъяслöн, вепсъяслöн, финн-ингерманландечьяслöн котыръясысь, Мордовияысь уна сикас войтырлöн министерствоысь. Тайö нин висьталö, мый коми йöзлöн медводдза чукöртчылöмыс и миян странаын, и финн-йöгра войтыр пöвстын вöлöма зэв тöдчана лоöмторйöн. Кыдзи пасйис аслас сёрниын Вячеслав Гайзер, сійö уна во кежлö индіс коми войтырöс сöвмöдан туйвизьяссö.
1980-öд воясö Комиö воис олöмас гырысь вежсьöмъяслöн тöвру. Войвыв сöвмöдöмкöд комияс кутісны вошны, рочöн кö — ассимилируйтчыны мукöд войтыр пöвстын. Этшаöн том йöз пöвстысь кöсйисны унджык тöдны ас войтыр, сылöн история йылысь. Коми интеллигенция, и медвойдöр гижысьяс, гöгöрвоисны, мый тадзи войтырыс дзикöдз бырас. 1989 вося мартын наукаяс академиялöн Коми филиалын муніс коми кывйöн вöдитчöмлы сиöм конференция. Сэні и чужис мöвп лöсьöдны "Коми котыр". Сэки жö лоисны "Изьватас" (медводдза веськöдлысьнас вöлі Виталий Канев), "Эжватас" (Василий Лодыгин), Печора юöс доръян общественнöй комитет (Валентина Семяшкина). Москваын олысь комияс öтувтчисны "Парма", Питерын – "Неватас" котыръясö. Сувтіс мог öтувтны налысь зільöмсö да, шуисны нуöдны коми войтырлысь съезд. Бöрйисны сэтчö 441 делегатöс. Резолюцияяслысь балаяссö дасьтісны Ко-ми филиалысь учёнöйяс, и налöн кывкутöмöн уджыс вайис зэв ыджыд водзöс. Тшöтш и съездлöн туйдöмöн 1992 вося майын Ижкарын чукöрт-чылісны Россияса, а декабрнас Сыктывкарын — став мирысь финн-йöгра войтыр. Сэні лöсьöдöм Консультативнöй комитетöн юрнуöдны бöрйисны Валерий Марковöс.
Локтан воö коми войтыр дасöдысь нин чукöртчасны асланыс съезд вылö. Конференция дырйи öтмунöмöн веськöдлысь Сергей Габов казьтыштіс воддза чукöртчöмъяслысь медтöдчана шедöдöмторъяссö. 1991 вося ноябрын мöд чукöртчылöм дырйиыс вöлі шуöма съездсö коми войтырлöн медвылыс тшупöда форумöн. Коймöд съездлöн кывкöртöдъяс серти республикаын вöлі котыртöма уна сикас войтырлысь министерство, нёльöд съездсянь чукöртчöмлысь шуöмъяссö збыльмöдöм могысь КР-са Юралысь вынсьöдö ассьыс индöдъяс. Витöд съезд бöрын кар-районъясын котыртісны öтмунöмлысь представительствояс, квайтöдыс шуöма топыдджык йитöд лöсьöдны мукöд кывъя войтыркöд, национально-культурнöй автономияяскöд. Сизимöд съезд вылын выльмöдöмаöсь öтмунöмлысь устав. Кöкъямысöд да öкмысöд съездъяссö вылö донъялöмаöсь и Россияса тшупöдын.
Коми йöзлöн водзмöстчöмыс заводитчöма кольöм нэмса кызьöд воясö на, кор Яренскын лöсьöдöмаöсь "Ко-ми котыр" (программасö сылы дасьтöма Питирим Сорокин), а Помöсдінын — коми автономистъяслысь чукöр. 1920 воын Дмитрий Батиев Россияса миннацысь зыряна отделкöд тшöтш босьтчöма чукöртны став коми-зыряналысь съезд. Сійöс нуöдöмаöсь 1921 вося январь 8-13 лунъясö. Сэки жö вöлі вöчöма Коми автономия лö-сьöдöмын медводдза воськовъяс, и 1921 вося август 21 лунö ВЦИК вынсьöдіс Коми автономнöй обласьт котыртöм йылысь индöд. Таво Комиын государственносьт лöсьöдöмсянь, а подувнас талы, Конституция серти, лоö коми войтыр, тырас нин 90 во.
Кызь-комын во сайын вужвойтырлöн правояс вöсна тышкасьны кутісны став мир пасьтала, та кузя декларация дасьтöм могысь ООН-лöн шуöм серти вöлі нуöдöма весиг вужвойтырлысь дас вося кадколаст. 1993 восянь тайö уджас пырöдчис и "Коми войтыр". Декларациясö ООН вынсьöдіс 2007 воын.
Талун öтмунöмыс Комиын медся пыдди пуктана общественнöй котыръясысь öти.
—И Коми войтырлöн съездлöн статус йылысь 1992 воын вынсьöдöм оланпас серти сöмын сылöн эм законъяс вöзйöм вылö право, — висьталіс КР-са Госсöветöн веськöдлысь Марина Истиховская. — Öтмунöм ыджыд пай пуктіс Коми Республикалысь Оланподув, государственнöй кывъяс, культура, мупытшкöсса озырлунъяс йылысь да мукöд оланпас дасьтöмö.Öні котырсакöд тшöтш уджалам кöр видзöм йылысь закон вылын.
Конференция дырйи жö Марина Истиховская сетіс "Кристаллы Серёгова" небöг гижысь Раиса Сажиналы Россияса премьер-министр Владимир Путинсянь письмö. "Единая Россия" партияöн веськöдлысьлöн тшöктöм серти йöзöдны сійöс отсалöма ютырлöн регионса юкöн. Аттьöалöм бöрын Раиса Александровна козьналіс ассьыс книгасö республикаса Юралысь Вячеслав Гайзерлы.
Коми войтырлысь медводдза съезд котыртан комитетöн юрнуöдіс Коми Республикаса министръяслöн сöветöн веськöдлысь Вячеслав Худяев. Сылöн кывъяс серти, вöлöмаöсь и съездлысь коланлунсö гöгöрвотöм йöз, кодъяс полöмаöсь коми войтырлöн ыджыдалöмысь. Но съездыс мунöма вывтіасьтöг, сэтчö чукöртчöм войтыр сёрнитöмаöсь Комиын олысь став йöзöс медся майшöдлана тöждъяс йылысь: кыдзи сöвмöдны вужвойтырлысь кывсö да культурасö, велöдны челядьöс чужан кывйö школаын, содтыны коми студентъяслысь лыдсö, кыпöдны клубъяс да нюжöдны туйяс. Коми йöзлöн водзмöстчöмöн котыртöма миннац, искусствояслысь гимназия, Национальнöй галерея, фольклор театр.
—Но унатор, мый шедöдöма вöлі кольöм нэмса öкмысдасöд воясö, öні бырис. Сідз, Сыктывкарса университетын тупкисны финн-йöгра факультет, юркарса национальнöй культураяслöн шöринын (вöвлöм "Октябрь" кинотеатр) талун сöмын вузасьöны да дискотекаяс нуöдöны, — висьталіс Вячеслав Иванович. — Отставкаö мöдöдöм правительствоын комиöн сёрнитысьыс некод эз вöв. Республикаын кö коймöд пай олысьыс — коми, и выль правительствоын комиыс мед вöлі жö. И Госсöветö бöрйысигöн партияяслы асланыс кандидатъяслöн списокъясö коми йöзсö колö пыртны. Быть колö казьтыштны коми небöгъяс, газет-журнал лэдзны отсöг йылысь, öд кыдз нö натöг позяс чужан кывтö сöвмöдны.
Збыльысь, кызь во сайын сувтöдлöм могъясыс тöдчанаöсь и öні, найöс олöмö пöртöм могысь öтмунöмлы ковмас уджавны и водзö. Коми наука шöринысь Кыв, литература да история институтöн веськöдлысьöс вежысь Александр Попов вöзйис "Коми войтырлы" ёнджыка зільны меставывса асвеськöдлан тэчасъяскöд öтув. Общественнöй котыръяслöн коланлун йылысь сёрнитіс и Н.Огарёв нима Мордовияса университетысь профессор Владимир Абрамов. Медводз сійö пасйис, мый кызь восайса чукöртчöмыс тöдчанаöн вöлі эз сöмын комилы, но и став финн-йöгра войтырлы. Комияслöн водзмöстчöмыс ышöдіс и мордваöс чукöртны ассьыныс съезд.
—Быд власьт зільö тöдчöдны ассьыс вермöмъяссö да дзебны тырмытöмторъяссö. И буретш общественнöй котыръяслы колö видзöдны власьтлöн удж бöрся да донъявны сійöс, — висьталіс Владимир Абрамов. — Уджыс тайö сьöкыд, но зэв колана.
Дерт жö, татшöм жö мог сулалö и "Коми войтыр" водзын.
