Дас кöкъямыс во сайын куим Василей: Чувьюров, Гущин да Лодыгин котыртлiсны медводдза "Василей" гаж. Могыс налöн вöлi эз сöмын пасйыны важ кадся Выль восö, а быд ичöтик грездысь да сиктысь кыпöдны сьылысь, ворсысь да йöктысь йöзöс. Öд быд сиктын эмöсь ыджыд сяма-таланта войтырыд. Такöд тшöтш куим Василейлöн воысь-во кыптiс и асланыс творческöй енбиыс. Найö быттьö öта-мöд костаныс кутiсны ордйысьны. Татшöм ордйысьöмас босьтчисны Зимстан, Помöсдiн, Скöрöдум, Пожöг, Дереваннöй, Носим да уна мукöд сикт. Сэсся гажыс пыр югзис и югзис. Медым кыпöдчыны пыр вылöджык, шылад тэчысьяс ассьыныс гижöдъяссö кутiсны сетны сьылöм-ворсöм вылö профессионалъяслы. И вочасöн сцена вылын лоисны нималана сьылысьяс да ворсысьяс. Гаж кыпöдысь месайясöс сцена вылысь вештiсны…

Таво петкöдчисны выль сьыланкывъясöн 13 котыр. На пиысь 9-ыс вöлiны Сыктывкарысь, Визинысь, Шойнатыысь, Выльгортысь, Косланысь. Зумыд тэчасногыс гажыслöн эз вöв. Тайöс пыр и казялiм, кор аддзим куш сценасö. Эз вöв сэні и пасыс, мый тайö "Василей" гаж. А сiдзжö и сценарийыс эз во уналы сьöлöм вылас. Мыйлакö гаж нуöдöм могысь пыртöмаöсь юкöнъяс важ фильмъясысь. Мыйла колö вöлі петкöдлыны "Девчатасö", "Любовь и голубисö"? Найö, ме думысь, гажсö эз кыпöдны, а дöзмöдiсны да и кадсö сёйисны. Шогöдiс и шылад тэчысьяс костын пудъясьöмыс. Быттьöкö, кодi код бöрся петкöдчö, босьтiсны пызан вылысь сюмöд дозъяс да öдйö саялiсны. Эг и гöгöрвоöй, кодi код бöрся петкöдчö. Водзті кö районса культура юкöнын вöчлiсны прамöй список, кöнi вöлi гижöма сьыланкывсö, сьылысьсö, кывбур и шылад гижысьсö, öнi абу гöгöрвоöмаöсь тайöс вöчны. Сцена вывсянь эськö Лидия Петровна Логинова шуис, авторъяссö пö ог юöртöй, а сöмын сьылысьяссö висьталам. Но кор нимтöм сьыланкыв кывзан, сэк кывъястö юрад он тувъяв. Гаж нуöдöмас зэв уна уджыс чуктiс Лидия Петровна Логиновалы. Весиг концерт вылын пукалысьяс кывкöрталiсны, мый тайö гажсö сиöма Лидия Петровна Логиновалы. Концерт нуöдысьыд сёрни-баснинас став тешсö ас олöмсьыс висьталiс и сьöлöмсяньыс пыр сьылiс.

Жюриын пукалысьяс пöвстысь куимöн ордйысисны и сьыланкывъясöн. Тöдчис, конкурсса уставыс абу либö ставыс бöрйöм ас йöз. Висьталöны, мый 40 пиысь бöрйисны 13 номер. Вöлi кö устав, öти номерöн позьö петны сöмын öти мортлы. Танi жö шылада-драмаа театрса артист Александр Кузнецов петаліс кыкысь: "Тэрыб даддьöн" да "Веж турун пöвстын" сьыланкывъясöн. Кыкысь петкöдчис и "Эжва йöлöга" ансамбль, кодöн веськöдлö А.Г.Горчаков: "Сё майбырöй, Аннаöй" да "Козйö, козйö" сьыланкывъясöн. Бöръяыслысь, кодöс радейтöны сьывны миян челядь, шылад вöчысьыс абу сöмын ладсö бурмöдöма, но и кывъяссö вежлалöма, кöнi коз путö оз пöрöдны ни блинтö оз пöжавны. Тайö выль сьыланкыв!

Ёна кажитчис Визинса "Девчата" ансамбль. Нёль мичаник ань сьылiсны "Баба шуд". Кывъясыс да шыладыс Елена да Игорь Пироговъяслöн. Гöлöсъясныс сöстöмöсь, юрганаöсь да ладаöсь. Тайö ансамбльнас юрнуöдö Надежда Дикоева. Вöлiны Шойнатыысь и кык том зон Альберт Ширяев да Иван Канев, кодъяс ворсiсны гитараöн да синтезаторöн, сьылiсны "Пожöм". Ставöн залын радлiсны, мый налöн сьыланкывйыс югыд руа, да и бура ворсöны. Но, тыдалö, кодлöнкö эз тырмыны чуньясыс тайö войтырыслы козинъяссö ставлы чуктöдiгöн: "Талы сетi, а талы эг на… вунöдi…". Зонъяс шог сьöлöмöн петiсны туйö. Чайтам, оз усьны мыла гöлöснас да сьöлöмсяньыс ворсöмнас, водзö на сюртчасны ордйысьöмъясö. Дерт, маитчисны, мый весиг "Диплом участника Василея-2011 года" некодлы эз вичмöдны.

Тайö концерт вылас югыд дзирдöн вöлiны Сыктывкарса искусство да культура колледжъясын велöдчысьяс. Найö петавлiсны сьыланкывъяс костын да дзирдöн моз югнитлiсны, вöчлiсны 2-3 воськов да сайöдчывлiсны сцена сайö, а видзöдысьяслы окота вöлi дырджык найöс кутны клопайтöмöн. Тайö нö пö мый, миянöс дэ-льöдöны. Оз вермыны миянлысь сьöлöмнымöс бурмöдны, дырджык сизьдыны.

Удораысь Михаил Логинов да Светлана Липина сьылicны "Баба гожöм" "Зарни ёль" оркестрлöн шыяс улын. Но джöмдылiсны сы вöсна, мый найö эз вермыны лöсьöдчыны оркестр улö сьывны. Велалöмаöсь асьнысö кывны öти баянöн ворсöм улын. Танi сцена вылас весиг вошö йöзкостса инструментъяс улас ворсöмыс. Колö вöлi петкöдчыны быдсяма коми инструментнас, кор кылiс конкурсса сьыланкывйыс. Сэк эськö гажыс кыпыд вöлi. Öд век став сьыланкывсö ворсiс Сергей Гусевöн юрнуöдöм улын "Зарни ёль" оркестр.

Тайö гажас сюртчисны медся тöдчана да нималана артистъяс Наталья Канова, Лидия Логинова, Вера Булышева, Максим Уляшёв, Александр Кузнецов.

Бура донъялiсны Ирина Чувьюровалысь сьыланкывсö. Сыöн гижöм кывбур да шылад улын "Коми муöйсö" сьылiс Наталья Канова. Ирина Чувьюровалы сетiсны 100 сюрс шайт да компьютер, а сьылысьсö вунöдiсны донъявны. Медводдза местасö сетiсны "Тэрыб дадь" сьыланкывлы. Кывъяссö гижис Лидия Логинова, а шыладсö — Михаил Оверин. Сьылiс Александр Кузнецов. Таысь Михаил Оверинлы чуктöдiсны диск лэдзöм вылö 90 сюрс шайт. Мöд места вичмис "Кöнкö веж турун пöвстöд" сьыланкывлы. Кывъясыс В.Т.Чисталёвлöн, шыладыс В.Я.Гущинлöн, сьылiсны Александр Кузнецов да "Эжваса дзоридзьяс" ансамбль. Коймöд местаын лои "Парма сьöмöсын сьыланкыв". Кывъясыс Николай Тюрнинлöн, шыладыс Марк Новосёловлöн. Сьылiс искусствояс колледжса "Коми сьылан" ансамбль, кодöн юрнуöдö ыджыд енбиа ань Валентина Ивановна Изъюрова.

Кыдзкö бокö колис и бур гöлöса да пыдди пуктана ань Вера Булышева, кодi сьылiс квайтöдöн "Гöрд пелыся му". Ми эг казялöй, мед казьтыштiсны либö сетiсны сылы козин. Концерт вылö воысьясöс сiйö гажöдiс уна мича сьыланкывйöн. Москваысь бара волiс и Павел Осипов, кодi сьылiс М.Оверинлысь да В.Тиминлысь "Тэ менам сьылан, менам мойд". Концертсö бура сигöртiсны шылада-драмаа театрса артистъяс, кодъяс котыртöмаöсь "Пармаса зонъяс" ансамбль.

Пыр окота, медым коми сьыланкывъяс чужисны быд во и быд во локтiсны "Василей" гаж вылö сиктса йöз. Эм быдлаын таланта йöзыд: верстьöыс и посниыс. Сöмын сиктса культурасö вермам кыпöдны районса юрсиктын, тайö сцена вылас, да и гажсö дасьтысьнас вермас лоны сöмын сиктын олысь морт. Öд тайö сцена вылас быдмисны и Лидия Логинова, и Вера Булышева, и Александр Кузнецов да мукöд. Сiдз нин уджсö бырöдiсны сиктъясысь, да и культураыс нин сэні кулан выйын. Отсаласны кö таланта да нималана профессионалъяс аддзыны сиктъясысь ас кодьныс жö таланта йöзöс да кыпöдасны найöс, сэк лоас мыйöн кутны лёксьыс сиктса войтырöс.

Думышттöг М.Л.Герцман шуис, мый мöд во тайö сцена вылас петасны роч сьылысьяс, тайö пö миян республикаса вермасьöм, и вöчам сiдз, мед и рочьяс сьыласны тшöтш. Мед бара эз ло сiдз, кыдз шуис Лидия Логинова: "Холодновато проходит..."