Ме, Вячеслав Васильевич Попов, чужлі Кöрткерöс районса Ыджыдвидз сиктын. Ачым коми. Шöр школа помалöм бöрын велöдчи Сыктывкарса университетлöн финн-йöгра факультетын регионоведö, öттшöтш босьті экономистлысь специальносьт. Велöдчöм бöрын уджалі вот инспекцияын, Коми Республикаса МВД-лöн экономическöй мыжъяслы паныд водзсасян отделын, сьöм овмöс министерствоын. Öні зіля "Россельхозбанк" восьса акционер котырлöн Коми филиалын. Водзö велöдча Киров карын юристö.
Меным, том коми мортлы, абу веськодь республикаса сикт-грездъясын ас войтырлöн олöмыс. Кыдзи петкöдліс йöзöс бöръя гижалöмыс, Комиын олысьыс пыр чинö и чинö. Тайöс торйöн нин казялан сиктъясын. Том йöз, оз инасьны да, мунöны каръясö. Тшöтш и меным ковмис мунны Кöрткерöсö, ас районса юрсиктö. Но ме кöть вежи öти сиктöс мöд вылö. Сэк жö менам тöдсаяс кольччисны овны Сыктывкарö. И тадзи вöчöны уна том енбиа войтыр.
Но эмöсь йöз, кодъяс карын велöдчöм бöрын бергöдчöны сиктö. Сідз, Ыджыдвиддзысь менам бур тöдса Виталий Мишарин некымын во сайын аддзис асьсö Висерысь, восьтіс сэні лызь кузя спортивнöй школалысь филиал. Сёрниті уна бать-мамкöд, кодъяслöн челядьыс котралöны лызьöн. И ставöн шуöны, мый налы воö сьöлöм вылас тайö школаыс. Челядь омöльджыка кутісны висьны. Да и бать-мам этшаджык на вöсна майшасьöны. Татшöм водзмöстчысь да зіль йöзыс эмöсь и мукöдлаын.
Менö зэв ёна майшöдлö ас районлöн олöм-вылöмыс. Тані медсясö видзöны скöт, быдтöны картупель да град выв пуктас, лэдзöны вöр. Видз-му овмöсыс ёнджыкасö кутчысьö нывбабаяслöн нэриник пельпомъяс вылын. Öд сэтчöс предприятиеясöн юрнуöдöны сöмын найö. Тайö Одыбысь Татьяна Васильевна Ларукова, Висерысь Лидия Семёновна Ивашова, Ыджыдвиддзысь Надежда Владимировна Макарова, кодкöд öти классын велöдчылі, Пезмöгысь Галина Леонидовна Тарасевич, Нёбдінысь Анастасия Семёновна Микушева да мукöд. Ог тöд, мый лоис мужичöйяскöд, но миян районын унджык кывкутана уджсö вöчöны нывбабаяс, и зэв бура. Сідзкö, и мужичöйяслы оз ков кольччыны.
Майшöдлö и сійö, мый Кöрткерöсса уна олысь, ас сиктас уджсö эз аддзыны да, быд лун ветлöдлöны Сыктывкарö. А мöдарсянь кö, и Сыктывкарса уна олысь волывлöны удж вылö Кöрткерöсö. Босьтны кöть ра- йонса администрацияöс, кöні уна зільысь олö Сыктывкарын. И быд лун волывлöны удж вылö 45 километр сайö да мöдарö сы мында жö. А ставыс öд тайö оз ёна бур боксянь тöдчы налöн удж вылö. Сы вöсна мый быд лун кык-куим час мунö туй вылö. Сэк жö колö и гортын ужын дасьтыны, челядькöд пукалыштны, гозъя коласын сёрнитыштны. Ме ногöн, петан туйыс эм. Аддзыны да индыны тайö удж вылас ассьыным енбиа войтырöс. А миян татшöмыс уна.
Шогöдö и сыысь, мый республикаса правительствоö пырысьяс лыдын абу ни öти коми морт. Ог кöсйы шуны ачымöс националистöн. Сöмын майшася ас войтыр вöс-на. Абу кö чина коми войтырыс, тайö висьталö и налöн аслыссикас оласног йылысь. Коми мортыд векджык вежавидзысь, оз радейт вывтіасьны, ошкыны да петкöдлыны асьсö. Со и тайö вежавидзöмлуныс оз сет сылы вывлань кыпöдчыны. Весиг ас серти тöда, менö кö оз ёна казявны миян начальникъяс, сідзкö, чайта, мый тадзи и колö.
Сэк жö мекöд орччöн уджалысь и меысь этшаджык тöдö, и меысь омöльджыка зільö, но вывлань кыпöдчö öдйöджык. Миян войтырлöн олöм вылас аслыссикас видзöдлас. И комияс некор оз кутны кыпöдны мукöд войтырлы паныд зык-шум. Öд ми ог пуктöй асьнымöс мукöдысь вылöджык. Сідзи нин артмö, мый миян озыр культураным, пыдынöсь вужъясным, но мыйлакö ми тайöс ог донъялöй.
Майшася и сы вöсна, мый вужвойтыр семьяясын бать-мамныс комиöсь, а челядьныс сёрнитöны рочöн да оз тöдны чужан кывнысö. Бур, мый миян каръясса детсадъясын да школаясын велöдöны коми кыв. Но тайö оз на сет позянлун миян челядьлы тöдны да сöвмöдны чужан кывсö. Колö, медым семьяясын пыр сёрнитісны комиöн. Но тадзи овлö сöмын сиктъясын. А карса семьяясын векджык вöдитчöны роч кывйöн. Миянлы кад нин гöгöрвоны, мый сöмын асьным вермам сöвмöдны чужан кывнымöс, культуранымöс да шедöдны тайö олöмас мыйкö ыджыдтор.
Тшöкыда волывла Коми Республикаса сикт-грездъясö да аддза, мый сиктса олысьяс, торйöн нин мужичöйяс, ёна юöны. Кутіс паськавны тайö омöльторйыс и нывбабаяс пöвстын. Ме ачым кык во сайын дзикöдз дугді видлавны курыдторсö. Но кызвыныс миян пиысь оз кöсйыны мынтöдчыны тайö грексьыс. Да и миян войтыр оз кужны юнысö. Век колö ныр вылö усьтöдз. А мыйта збыльысь юöны йöзыс, некод оз тöд.
Петан туй пыдди вöзъя сöвмöдны спорт. Кутшöм долыд видзöдны телевизор пыр миянлысь нималана войтырöс, кодъяс исласьöны лызьöн, купайтчöны йöрданын, ворсöны футболöн. Но тайöс найö вöчöны сöмын асьнысö нимöдöм могысь. А ме ногöн, колö, медым миян йöз аддзисны, мый веськöдлысьяс збыльысь радейтöны спорт, но оз асьнысö ошкöм ради.
Миян сикт-грездъясын тöжд-майшасьöмыс зэв уна. Оз тырмыны детсадъяс, пöдласян выйын школаяс, этша сьöм вичмö сиктса культура вылö, омöльöсь туйяс, оз пыр ас кадö могмöдны сиктса олысьясöс вöрöн. Чайта да, буретш татшöм жö серпасыс Кулöмдін, Мылдін да сиктса мукöд районын. И сöмын öтвылысь ми вермам вежны ассьыным олöмнымöс бурланьö. Некод тайöс оз вöч миян пыдди.
Ме ачым коми морт, кодлы абу веськодь сиктын олöмыс. Зіля вöчны ставсö, медым унджык вöлі бурланьö вежсьöмыс. Унджык кö лоас ме коддьöмыс, кодъяс висьöны сьöлöмнаныс коми войтыр вöсна, сэки и коми сиктыс, сэні олысьясыс кутасны сöвмыны, кыпöдчыны вывлань.
