Водзтіджык пыр чайтлі, мый дыр олысьясыд миян эмöсь сöмын Кавказын, кöні гöраясса сöстöм сынöдыс да виноградысь вöчöм винаыс сетö мортлы дыр кежлö дзоньвидзалунсö. Но, вöлöмкö, дыр олысьясыд вöлöмаöсь и Комиын. Выль 2011 во водзвылын удайтчис паныдасьлыны Сыктыв районысь Рай грездса вöвлöм олысь Мария Александровна Беляевакöд, кодлы выль вося январь 16 лунö тырö 100 арöс. Весиг чуйми сыкöд сёрнитігöн. Пыр на сöстöм вежöра. Бура помнитö важсö. Öні олö моньыскöд, Роза Афанасьевна Беляевакöд, коді уджалö Коми Республикаса видз-му овмöслöн научно-исследовательскöй институтын (НИИСХ).
—Миян Рай грездным пуксьöма Ыджыд Визин юбердса мыльк вылö, — казьтылö Мария Александровна. — Сэтчöс мича вöр-ваыс, сöстöм сынöдыс, а сідзжö уна вося зіль уджыс, тыдалö, и сетісны меным та дырасö овны.
Зіль бать-мам дорын быдмылöмаöсь куим чоя-вока. Школаын Мария велöдчöма сöмын öти тöлысь. А сэсся, кыдзи помнитö асьсö, пыр уджалöма колхозын, а бöрынджык совхозын.
—Война кадö нелямын лунöдз вöлі вöвъясöн пöдругаяскöд гöрам, — ньöжйöник казьтылö олöма ань. — Сыысь öтдор, вöрын квайт во пöрöдчи да кыскаси. Молочно-товарнöй фермаöн куим во веськöдлі. Вит-ö-квайт во капуста быдті. Öти гектар вылысь вöлі 600 центнерöн босьтам.
Кывза дзор юрсиа, косіник чужöма, абу ыджыд тушаа аньöс да шензя. Со öд мыйта сылы удайтчöма бергöдны олöм чöжыс. Да и шензьынысö нинöм. Сійö кадас коми аньясыд быд сикт-грездын вын-эбöс жалиттöг уджалісны, зілисны öдйöджык öтувъя овмöснысö кыпöдны. Бур уджысь Мария Александровнаöс пасйылісны "За доблестный труд в Великой Отечественной войне 1941-1945 гг." медальöн, "Ударник 9-й пятилетки" знакöн, уна мукöд наградаöн.
Сэтшöм жö зіль вöлі верöсыс, Яков Васильевич, коді колхозын кузнечöн уджалöма. Зэв киподтуя мортöн нимавлöма. Быдтор сяммылöма вöчны. Помнитö на авъя ань, кыдзи верöсыскöд тулыснас разисны важ керканысö, сэсся гожöмбыд выльöс кыпöдісны, а арнас пырисны нин овны.
—Нёль пиöс верöскöд кок йылö сувтöдім, — водзö казьтылö Мария Александровна. — Ставнысö бура велöдім. Вениамин Визинса лесничествоын уджаліс. Валентин республикаса прокурорöс вежысьöн вöлі. Владимир "Комиагропроект" институтын зілис, а Михаил — республикаса МВД-ын.
Дерт, жаль, мый талун куим пиыс абу нин ловъяöсь. Но налöн вужъясыс нюжалісны-паськалісны. Öні Мария Александровналöн квайт внук-внучка, квайт правнук-правнучка, кык праправнук. Сідзкö, Рай грездса Беляевъяслöн рöдыс мунö водзö.
А нöшта Мария Александровна пасйö, мый налöн семьяыс пыр кутіс вöр-ваыскöд топыд йитöд. Помнитö на сійö, кыдзи ичöтдырйиыс чöсмасьліс пожöм лиöн, коляозйöн. Быд гожöм ёна вотчывліс. Мукöддырйи суседкаясыскöд кызь километр сайö ветлывлісны. А верöсыс вöлі эз сöмын бур кузнечöн, но и зіль вöралысьöн. Кыйлывліс и йöраöс, и кöчöс, и сьöла-тарöс. А челядьныс налöн радейтлісны вуграсьны. Гортаныс пыр сюрукъясöс, ыжъясöс видзлісны. Со и пызан вылад пыр вöлі тыр бур вöлöга. Тайö öд сідзжö тöдчис сылöн дзоньвидзалун вылö.
Некымын лун сайын Мария Александровна Беляевалы гортас звöнитліс Сыктывкарса ветеранъяс сöветöн юрнуöдысь Владимир Тихонович Пыстин, юасис, кыдзи сійö олö, сиис дзоньвидзалун. Кыдзи шуис моньыс Роза Афанасьевна, бöръя кадас энькаыс неуна висьöдчыштіс. И ми сідзжö сиим сылы, мед оз на сетчы ви-сьöмъясыслы да водзö на олас тайö шонді улас.
