Вужвойтырöн асьнысö вермöны шуны сэтшöм йöз, кодъяс олöны бать-мамыслöн, пöль-пöчыслöн нэмöвöйся му вылын, кöсйöны видзны да сöвмöдны ассьыныс кывсö, культурасö, оласногсö. Но налöн му вылö воис да ыджыдалö унджык лыда войтыр. Тадзи пасйöма вужвойтырлöн правояс йылысь ООН-öн вынсьöдöм декларацияын да тшöктöма государствояслы отсавны ассьыс вужъяссö видзны зільысь войтырыслы. И та серти кö, Россияын кызвын йöзкотырыс — вужвойтыр. Но отсавны ставныслы — миян страналöн вын-эбöсыс оз тырмы, и мудера мöвпыштöмаöсь юкны уна сикас кыв вылын сёрнитысь йöзсö кык пельö — вужвойтыр да этша лыда вужвойтыр вылö. Ветымын сюрсысь кö этшаджык — государствосянь отсöг вичмöдасны, унджык кö — "асьныд нин кыдзкö"...
Во мысти коми войтыр чукöртчасны асланыс дасöд съезд вылö. Öтмунöмса исполкомлöн декабрь 17 лунö чукöртчылігöн финн-йöгра войтырлöн витöд съездса делегат Михаил Третьяков (Ухта кар) вöзйис öнісянь нин заводитны дасьтысьны съезд кежлас да чорыда корны, медым коми йöзлы тырвыйö сетісны вужвойтырлысь правояссö. Правоа да правотöм ("еджыд" да "сьöд") вужвойтыр вылö юкöмыс разі-пели торйöдö и йöзсö. Буретш öд кокньöдъяс вöсна кодсюрö изьватас пиысь кöсйö янсöдчыны мукöд комисьыс. Михаил Васильевичлысь вöзйöмсö позьö гöгöрвоны и, чайтсьö, колö ошкыны. Изьватас-эжватас-удорачи-луздорчи да мукöдтас, -чи вылö юксьöм-вензьöм дорысь бурджык öд и водзöсаджык тшöктыны Россияса власьтлы вежны оланпасъяссö, быд сикас войтырлы сетны öткодь правояс.
Дерт жö, "Коми войтыр" кö босьтчас тайö уджас, содас и аслас öтмунöмлöн тöдчанлуныс, видзчысьöмöнджык кутасны индавны- туйдавны сылы и быд сикас чина йöзыс. Декабрь 10 лунö Сосногорскса "Коми котырлöн" (öтмунöмлöн сэтчöс юкöн котыртчигас на босьтлöм нимысь эз эновтчыв) чукöртчылігöн видліс ыджыдалыштны сэтчöс районса юралысь Игорь Леонов (кодсюрö шуö, выльöн бöрйöм райсöветса депутатъяс пö декабрь 10 лунас сійöс эз на вынсьöдны веськöдлан удж вылас). Игорь Леонов шыöдчöма коми войтырлöн районса конференциялöн делегатъяс дорö, медым найö вежасны юрнуöдысьсö – Николай Белыхöс. Но коми йöз абу кывзысьöмаöсь Леоновыдлысь, мöдарö, асьсö на кулитöмаöсь. Чукöртчим пö öд сёрнитны жилищно-коммунальнöй овмöсын тырмытöмторъяс йылысь, Уквавомын олысьяс кынмöны, челядь вылыс паськöмöн школаас велöдчöны, а районса администрация та вöсна оз майшась. Игорь Леонов пö ыштö лоны Сосногорск да орчча Изьва районъяссянь Госсöветса депутатöн да, та вöсна и ворсöдчö Изьва вожын олысьяскöд.
Сосногорскса коми войтырлöн конференция вылын вöлöма Мария Кузьбожева, да сійö вöзйис шыöдчыны та кузя ёсь письмööн республикаса Юралысь Вячеслав Гайзер дорö. Исполкомö пырысьяс воисны сыкöд öти кывйö, корисны Юралысьöс колана ног донъявны Игорь Леоновлысь сёрнисö да видзöдны, медым власьт тэчасъясын зільысьяс эз сюйсьыны общественнöй котыръяслöн уджö да эз падмöдны сійöс.
Исполкомлöн чукöртчылігöн жö видлалісны республикаын национальнöй образование сöвмöдöм кузя уджтаслысь, рочöн кö, концепциялысь бала. Татшöм документас пö колö индыны мытшöд-падмöг венан туй-визьяс, а велöдан министерствоöн дасьтöм кабалаын тöжд-могсö сöмын вель кузя лыддьöдлöма (кöть и тайö нин висьталö, мый гöрöдыс уна), сэк жö петан туйсö куим-ö-нёльöс и пасйöма: гоз-мöд ичöт школаын видлыны посни челядьöс чужан кыв вылас велöдны, а öткымын классын тадзи жö и математика да мукöд предмет сетны. Министерство вывті нин явö зільöма öвтыштчыны аслас веськыд могъясысь, тыдалö, жель нин оз кöсйы бергöдны, медым коми кывсö республикаын велöдісны детсадъясын, школа-ясын, училищеясын да вузъясын. Сыктыв районса велöдысьяс донъялöмаöсь концепциясö да шуöны, миян, сиктса йöзлöн, видзöдлас серти пö тані некутшöм тöдчана мог абу индöма, минобразлöн пö национальнöя велöдöм кузя весиг туянаджык мöвп ни вöзйöм оз тыдав.
Регыд нин кагалöн медводдза классö мунігöн бать-мамыс, школа да кар-районса юралысь кутасны кырымавны сёрнитчöм, кöні индасны, кутшöм кывъяс кутас велöдны кагаыс. Та вöсна "Коми войтырлы" колö ышöдны коми бать-мамöс, медым челядьыс велöдісны чужан кывсö, мед эз ло Кöрткерöс районса Шойнатыын моз, кöні дасьтöмаöсь ас кыв велöдöмысь мездан кабалаяс да тшöктöмаöсь кырымавны найöс бать-мамлы.
Районса администрация — школалöн учредитель — тшöктö директорлы эновтчыны коми кывйысь, мöдыс кывзысьö да бöбйöдлö бать-мамöс. А юаласны кö, мыйла пö дугдінныд чужан кывтö велöдны, районса власьт век дась вочавидзны, мам-батьыс пö кöсйисны да. Гашкö, и Шойнатыын та- дзи вöлі. Кыдзи минобраз кокньöдчö, сідзи и муниципалитетъясын сьöктöдчыны оз кöсйыны. Öд коми кыв велöдысьяс ковмасны, а медым том специалистъяс локтісны, колö найöс шоныд патераöн да бур удждонöн могмöдны. А тадзтö шог ни мог абу.
Национальнöя велöдан туйвизьяс вылын уджалöны на, и та кузя документсö вынсьöдтöдз "Коми войтыр" öтмунöмлöн исполком кöсйö на чукöртлыны велöдысьясöс, учёнöйясöс сёрнитны сы йылысь "гöгрöс пызан сайын".
