Изьваын туйяс вöчöм-дзоньталöм да такöд йитчöм мытшöдъяс венöм йылысь сёрнитісны декабрь 7 лунö "Коми войтыр" öтмунöм-лöн районса конференция дырйи. Культура керкалöн вель ыркыд залын чукöрмис морт квайтымын: сикт-грездъясысь делегатъяс, сэтчöс да бокиса гöсьтъяс. Бöръяяс лыдын позьö пасйыны Комиын националь- нöй политика кузя министр В.И.Коробовöс, "Коми войтырлöн" исполкомöн юрнуöдысь С.И.Габовöс, республикаса туй агентствоöн веськöдлысь Э.В.Слабиковöс, Госсöветысь депутат А.А. Лазицкийöс, Сосногорск да Изьва районса юралысьяс И.В.Леоновöс да П.Н.Дитятевöс.
Конференция вылас сёрни паніс Изьва районса коми войтырлöн нырщик Л.Б.Сметанин.
Леонид Борисович чолöмаліс чукöртчысьясöс, юöртіс конференциялысь уджаланногсö да сетіс кыв районса видз-му овмöс управлениеöн веськöдлысьöс вежысь Т.П.Суворовалы. Татьяна Петровналöн докладын уна вöлі лыдпасыс: кымын сюрук коли районса колхозъясын, мыйта скöт видзöны ас овмöсъяс, уна-ö йöв да яй сдайтöма таво вузöс вылö... Дерт, сьöкыдлунъяс казьтывтöг чиналöн сёрниыс эз артмы. Татьяна Суворова пасйис, мый ас овмöссалы сьöкыд инавны йöв-яйсö, та понда унаöн дугöдчöны скöт видзöмысь. Колхозъясад олöмсö госаöн он жö шу – кöрым абу тырмымöн, уна во куйöдавтöм муяс вердöны омöля, техника важмö, а выльсö ньöбны нинöм вылö. "Скöт видзöмысь öтдор колö корсьны мöд сикас уджъяс, кодъяс эськö вайисны содтöд сьöм", – восьтіс кывзысьяслысь синсö районса видз-му овмöс управлениеöн веськöдлысьöс вежысь. Но мыйсяма уджъяс, сідз эз и стöчмöд.
Сэсся йöз водзö петіс районса администрацияöн веськöдлысь. Час джынйысь дырджык Пётр Николаевич висьтасис районса экономикаын да социальнöй юкöнын талунъя серпас йылысь. Видзöдöмпöръя, сылöн докладыс некодöс торъя эз чуй-мöд. Бара жö быд сикас лыдпассьыс залын пукалысь-ясöс мöдіс очсöдлыны. Юралысьлöн "дженьыдик" юöрын тшöкыдджыка юргисны районлöн гырысь вермöмъяс: сэтшöмтö овмöдчанінлы мусир перйысьяслöн тшöт весьтö ньöбöма закод петкöдан машина либö трактор, татшöмтö сиктын ола-нінъяс капитальнöя дзоньтасьöм программа серти выльмöдöма стрöйбаяс да сідз водзö. Медым сёрниыс эз артмы вывті тшапитчана, чина гежöдика гарыштліс и олан мытшöд-шыбöльяс йылысь. Мукöд районсалöн моз Изьва сикт-грездъясын ыджыдалö уджтöмалöм. Ко-лö лэптыны выль оланінъяс, школа-садъяс, ФАП-яс, выльмöдны бурдöдчанінъ-ясын оборудование... "Вочасöн тайö уджыс мунö, – эскöдіс Пётр Дитятев, – но сьöм тырмытöм понда унатор на абу вöчöма". Висьтасьöмсö помалігöн администрацияса веськöдлысь лыддис кольöм вося конференциялысь резолюция да юöртіс, мый вöчöма сы серти. Юралысьлöн кывъясöн кö, кызвын корöмсö лои пöртöма олöмö.
Сёрни ловзьыштіс, кодыр трибуна дорö кутісны петавны делегатъяс. Изьвайыв- саяслöн нимсянь шыöдчис М.И.Хохлин. Том, Койю посёлокъясысь, Картаёль грездысь олысьясöс майшöдлö Сосногорск районса Керкилань мунан туй, кодöс бöръя кадö некод оз дöзьöрит-весав. Колö пасйыны, мый изьвайывсаяслы тайö – "ыджыд му" вылö дзик öти петанін. Ас районсаяс важöн нин эновтчисны сыысь, а Сосногорск администрациялы Том – Керки туйыс сöмын содтöд юр висьöм, öд сыладор вожын налöн олысьыс абу. Михаил Ивановичлы вочакывйöн петіс И.В.Леонов. Сосногорск районса веськöдлысь эскöдіс, кöть пö кутшöм сьöкыд эз ло, выльлунсянь заводитам весавны тіянлысь туйтö. Залын пукалысьяс шонтыштісны кияссö гораа клопайтöмöн. Сиктсалы збыльысь вöлі нимкодь: кöть ичöтика, но личалас дзик нин быттьö разьны позьтöм джаггöрöд. А менам нюм петіс: бöр-йысьöм водзвылад татшöм сяма дивöыд уна на лоö!
Збыльысь кö эськö и мукöдлы тшöтш уси татшöм шудыс, Изьваад öд шогмытöм туйясöн майшасьысь сикт-грездыс тырмымöн на. Шуам, Мошъюга грездысь делегат Н.В.Вокуева пасйис, вöлöкным пö кызь вит километр кузьта и эм, а сійöс вуджöмыс – шогöдантор. Гуран вылын гуран! Быд тулыс посъяссö жуглö ойдöм ва. Юрсиктысь отсöг виччысьны некор, и грездсаяс ас вынöн дзоньталöны ёль-шор вуджанінъяссö.
Стöчмöда, Изьва районса кызвын туй бöрсяыс видзöдö "Север" котыр. Директорыс – С.З.Семяшкин – тшöтш воліс конференция вылö. Семён Зиновьевич гöгöрвоöдіс: туйяс дзоньталöм вылö вичмöдöм сьöмыс оз тырмы, сэсся кывкутысь агентство деньгасö мöдöдö ёна сёрмöдчöмöн. Таысь кындзи тöдчана мытшöдыс сыын, мый специалистъяс оз тырмыны. Бытьöн пö медалам уджалысьяссö республикаса мукöд кар-районысь да весигтö Украина-Белорус- сияысь. Тешкодьтор артмö: Изьваын тшем уджтöмалысь, а зыр воропö кутчысьны, грейдер руль сайö пуксьыны некодлы!
Юрын коли и Няшабöжысь Л.С.Сметаниналöн висьтасьöмыс. Лидия Степановналöн кывъяс серти, уна во сэтчöссалысь сьöлöмсö нюкыртіс сикт шöрын шор вомöн нюжöдöм пу пос. Ветланіныс пö сы выйöдз ропмунöма, быть таво сійöс ковмис разьны. Öні йöзыс воöд-чöны гортöдзыс кытшола туйöд, ыджыд пос кузя, шойна бокті. Ар-тöвнас пемыдъяснас непöштö челядьлöн, но и верстьöлöн лолыс ыркмунлö. Колö пö эськö пу поссö бöр лöсьöдны, да овмöдчöминлöн бюджетын сьöмыс тырмас сöмын кöрт тув вылö. Тані ме бара на казьтышті мошъюгасаясöс, кодъяс бокысянь отсöг виччысьтöг ас выннас котыртöны дзоньтасян уджъяс. Мыйла нö эськö Няша-бöжын олысьяслы не помечалыштны? Шойччан лунö чукöртчыны да öтув вынöн нюжöдны шор вомöн ву-джанінсö. Тадзикöн, чайта да, мытшöдсö öдйöджык лоö бырöдöма. Дерт, кодлыкö колö тайöс котыртны. Шуам, сиктса администрациялы, но, тöдчöда, ставыс сэтчöс олысьяс сайын – аслыныс öд вöчöны, оз бокöвöйлы.
Конференция вылö волысьяс ёна на шуасисны ветланінъяс йылысь. Косталöмöн кыпöдлісны и мукöд юалöмъяс. Изьваса шöр библиотекаöн веськöдлысь З.А.Канева норасьыштіс коми газет-журналъяс да небöгъяс тырмытöм вылö. В.И.Коробовлöн воча сёрниыс неб-зьöдіс аньлысь сьöлöмсö. Министр кöсйысис могмöдны районса став библиотекасö тайö йöзöданторъяснас. Висьтасьöмсö сигöртігмоз Валерий Иванович вылö донъяліс "Коми войтырлысь" районын уджсö да козьналіс водзмöстчысьяслы Почёт грамотаяс.
С.И.Габов тшöтш аттьöаліс Изьваса уджъёртъяссö, сэсся пасйис: кöть кутшöм сёрни оз ветлы, "Изьватас" да "Коми войтыр" öтмунöмъяслысь öтсöгласа, ёрта уджсö торкны некод оз вермы.
Конференция воис пом-лань. Делегатъяс вынсьöдісны резолюция да торъя сьöлöмкылöмъясöн, быдöн асланыс сикт-грездын мытшöдъяс бырöдöм вылö лачаöн ра-зöдчисны район пасьтала. Эска и ме, мый нелючкисö лоö бырöдöма. Медвойдöр туйяссö коркö дзоньталасны да Изьваса войтыр кокниа лолыштасны: туй кö эм, сідз-кö, водзö на олам – сöвмöдам Айму, кыпöдам коми сикт!
