2012 вося январын тырö "Коми котыр" (öні "Коми войтыр") öтмунöмлы подув пуктöмсянь 20 во. Коми войтырлöн историяын сэксянь заводитчис, позьö шуны, выль кадколаст. Сідзжö и ыджыд вежöра да пöсь сьöлöма уна йöзлы тайö öтмунöмас зільöмыс отсаліс аддзыны асьнысö. Öти на пиысь Жанна Ивановна Прошутинская, коді пыр тöждысис ас войтыр вöсна.
—Чужлі Кулöмдін районса Носим грездын, — висьталö авъя ань. —Зэв мича сэні вöр-ваыс. Менам челядьдырйи грездын олöмыс пуöмöн пуис. Вöлі школа, культура керка, лавка, больнича. Сöвмис видз-му овмöс. Быдöнлы вöлі удж. Сэки уджалысь морттö пыдди пуктылісны. Йöзыс олісны öтувъя тöжд-могöн, öти ыджыд семьяын моз. А öні чужанінö волывлігöн аддза, кыдзи вочасöн кусö сикт-грездын олöмыс. Муяс да видзьяс тырöны раскöн. Таво Носимын пöдлалісны начальнöй школа. Челядьлы лоö ветлöдлыны велöдчыны орчча посёлокö. Татшöмторйыд паныдасьлö Россияса и уна мукöд пе-льöсын. Но менö майшöдлö коми войтырлöн аскиа луныс. Со и пы-рöдчи öтмунöмлöн уджö.
Быд пöрйö Жанна Ивановналысь йöз водзын пöсь сёрнисö кывзігöн юавлывла ассьым, мыйла сылы колö тайö общественнöй уджыс. Öд вöчны мыйкö йöзлы бур вылö, аддзысьлыны гырысь чиновникъяскöд кутшöмкö сиктлы либö котырлы отсöг сетöм могысь абу нин сэтшöм кокни. Колö и бур тöдöмлун, и писькöслун, и дзоньвидзалун. Но мöд ногöн тайö мортыс овны оз вермы, кор абу ставлы лючки-ладнö чужан муын.
Жанна Прошутинская неважöнöдз вöлі госслужащöйöн. Ас кадö бура помаліс Ленинградын Герцен нима педагогическöй институт, РФ-са Президент бердын госслужба да управление кузя Россияса академия. Велöдіс школаын, зілис комсомольскöй да партийнöй удж вылын, вöлі Выльгорт сиктсöветын да Сыктывдін райсöветын исполкомса секретарöн, Сыктывдін районса сöветöн веськöдлысьöс вежысьöн, Коми Республикаысь уна сикас войтырлöн министерствоын юристöн, Коми Республикаын РФ-са Президентлöн представительствоын право кузя экспертöн. Сылöн зільöмöн вöлі лöсьöдöма "Коми котыр" öтмунöмлысь да Коми Республикаса унджык национально-культурнöй автономиялысь устав кузя документъяс.
1976 восянь зіля петкöдчö общественнöй уджын. "Коми котыр" öтмунöмлöн исполкомö пырысь. Сылöн водзмöстчöмöн лöсьöдöма "Коми Республикаса вужвойтыр нывбабаяс" öтмунöм. Пырö сэтчöс правлениеö. Збыльмöдіс республикаын "Гортын мырдöналöмысь видзчысьöм" Россиялысь да Америкалысь öтувъя проект. Öні юрнуöдö Сыктывдін районысь государственнöй да муниципальнöй службаса ветеранъяслöн уджöн.
Весьшöрö некор эз вермы овны. Пыр тöждысис депутатъяслысь, районса да сиктъясса исполкомъяслысь уджсö бурмöдöм вöсна. Дугдывтöг кутіс мукöд районысь удж кузя ёртъясыскöд, республикаысь Госсöветса, РСФСР-ысь, СССР-ысь Верховнöй Сöветъясса, РФ-ысь Государственнöй Думаса депутатъяскöд йитöдъяс. Сыктывдін районын сылöн зільöмöн куим сельсöвет босьтчисны вужйöдны сиктса исполкомъяслысь бур опытсö, велö-дісны депутатъясöс, муниципальнöй тэчасъясса уджалысьясöс. Сылöн водзмöстчöмöн жö РФ-са да КР-са национальнöй йитöдъяс кузя законъясö пыртöма уна бур выльтор, дасьтöма Коми Республикалöн государственнöй национальнöй политикалысь туйвизьяс да уна мукöд тöдчана документ.
—Ме эг öтчыдысь тöдмасьлы сессияяс вылын депутатъяслöн уджöн да казялі, мый унаöн на пиысь оз кужны вö-дитчыны ни документъясöн, ни уджавны йöзкöд, — юксьö мöвпъясöн Жанна Ивановна. —Со и колö депутатъясöс да администрацияясысь специа-листъясöс дугдывтöг велöдны. Öд налы уджавны асланыс бöрйысьысьяскöд. Сэк жö окотапырысь сёрнитлывла тöлка, пыдісянь мöвпалысь депутатъяскöд. Татшöмъяссö абу ян-дзим пуксьöдны и ыджыдджык улöс вылö. Сэк жö миян администрацияын мыйлакö босьтöны удж вылö карса войтырöс, кодъяс оз тöдны сиктса йöзлысь тöжд-майшасьöмъяссö. Со и районын уна на нелючкиыс. Войтырлы, дерт жö, абу сьöлöм сертиыс чиновникъяслöн веськодьлуныс. Некодлы эз во сьöлöм вылö, кор пöдлалісны ра-йонса больничаын нёль отделение. А öд сэні бурдöдісны йöзсö весиг сьöкыд война воясö. Бурдöдчан жыръяс дзоньталöм пыдди район-са веськöдлысьяс öдйöджык тупкисны найöс. Абу кö нинöм, оз ков и немтор вöсна майшасьны. Йöзыс эськö сувтісны районса юралысьяслöн веськодьлунлы паныд. Вö-лі чукöртöма 500 кырымпас. Но миян власьтъяс сідзи и эз кывзысьны некодлысь. Ыстысисны сьöм видзтöм вылö. Тадзи жö тэрмасьöмöн пöдлалісны Лöзым сиктын да Кöмъяр посёлокын школаяс.
Бöръя 16 во чöжöн Сыктывдін районысь "Коми котыр" öтмунöмö пырысьяс, на лыдын и Жанна Прошутинская, эз этша вöчны ас войтырлы бурсö. Найö унаысь шыöдчылісны районса администрация дорö йöзöс оланінöн, муöн могмöдöм, гöля олысь семьяясысь челядьлысь шойччöм котыртöм кузя. Буретш на отсöгöн Выльгортса мöд номера шöр школаын вöлі лöсьöдöма коми кыв да литература кабинет. "Коми котырын" зільысьяс кадысь кадö мöдöдöны сиктса школаясö коми небöгъяс, спортын вöдитчан эмбур. Уна во сайын налöн водзмöстчöмöн вöлі нуöдöма сьыланкывлысь "Завалинка" фестиваль, коді вочасöн лоис сиктса войтырлöн öтувъя праздникöн.
—Талун менö ёна майшöдлö коми сиктлöн аскиа луныс, — сёрнисö помалігöн нин шуис Ж.И.Прошутинская. — Ёна кöсъя, мед агропромлы государствосянь отсöгыс вöлі ыджыдджык. Мед эз кус олöмыс Коми муын, мед эз вош мича да мыла коми кывным. Колö вöчны ставсö чужан кывнымöс сöвмöдöм могысь. Лыддя, мый сиктъясын оз ков пöдлавны школаяс, культура керкаяс, бурдöдчанінъяс. Буретш сикт-грездъясын и петкöдчö коми олöмлöн кöрыс. Сідзкö, медводз оз позь вунöдны сэні олысьяс йылысь. А миян веськöдлысьяс кутшöмкö вöвлытöм гырысь уджтасъяс олöмö пöртігöн веськодьпырысь видзöдöны прöстöй морт вылö, сылöн тöжд-майшасьöм вылö. Зэв ёна кöсъя, медым öнія "Коми войтыркöд" да сиктса мукöд татшöм котыркöд топыдджык йитöдъяс кутіс республикаса Общественнöй палата. Öд ставным ми вöчам öтувъя удж. И аттьö кöсъя шуны налы, кодъяс кыпöдісны миянлысь республиканымöс. Сідзкö, колö сьöлöмсянь видзны да дöзьöритны асланым пöль-пöчьяслысь мусö, кöні водзö овны миян челядьлы, внук-правнукъяслы.
