Кольöм во июньын Удора районса Чим посёлокысь вошисны первой класса велöдчысьяс Андрей Василенко да Андрей Мелещук. Асланыс велöдыськöд челядь мунöмаöсь посёлокбердса вöрö. Сэні ворсі гöн тайö кык зонкаыс торйöдчöмаöсь котырсьыс. И найöс öнöдз корсьöны...

Журналистъяскöд неважöн аддзысьлігöн Комиын РФ-са прокуратура бердын следственнöй управлениелöн следственнöй комитетöн веськöдлысь Николай Басманов висьталіс, мый кольöм во Удораса челядьöс корсьöм вылö видзöмаöсь матö 10 миллион шайт.

Андрей Василенкоöс да Андрей Мелещукöс 2009 воас корсисны Чимын да матігöгöрса мукöд сикт-посёлокын олысьяс, спасательяс, погона йöз. Жаль, но эз аддзыны. И таво лым сылöм бöрын бара заводитöмаöсь корсьысьны.

Чим гöгöрса яг-раскыс зэв аслыспöлöс. И водзті джык нин сэні вошлöмаöсь йöзыс. Сі дз, мунöма вотчыны олöма ань, а гортас бöрсö абу бергöдчöма. Тадз жö лоöма и вöралыськöд. Корсьöмаöсь эськö кыкнансö, но ни чумансö, ни ружьесö абу аддзöмаöсь.

Комиын РФ-са прокуратура бердын следственнöй управлениелöн следственнöй комитетöн веськöдлысьöс вежысь Андрей Исаев висьталіс, мый Чим гöгöрын корсьысигöн аддзöмаöсь ош гуяс, гортса пемöсъяслысь лыяс да понъяслысь дом поводъяс. Вöрас пö олöны пияна некымын энь ош да кöин котыръяс.

Пармаас вына тöв ныр уналаын вужнас пöрöдöма пуяссö. Кöнсюрö 200 метр пасьталаын пожöм-козйыс куйлö. Буретш татшöминъяссö öні и туялöны. Маті гöгöрса нюръясö вöйны эз жö вермыны, налöн веркöсыс пö крепыд, верстьö морт кокниа мунö-восьлалö.

Пресс-конференция вылын казьтыштісны, мый бöръя кадас Комиын вошöма 7 ныв-зон. Сідз, 2006 воын Сосногорскын кык велöдчысь абу локтöмаöсь гортас. 2009-ас Кöрткерöс сиктысь нывка вошöма.