Ыджыд Вермöмсянь 65 во тырöмлы Изьва районын вöлі сиöма "Батьяслöн туйöд" проект. Медводз "Изьватас" öтмунöмлöн водзмöстчöм серти март-апрельын шуисны нуöдны Усвавомсянь Щельяюрöдз лызьöн котралысьяслысь марафон. Тайö туйöдыс уна во сайын мунісны фронт вылö кöр видзысьяс асланыс кöръясöн. Но бур кöсйöмсö сьöкыд лои збыльмöдны, чарöмыс эз артмы да.
Сэки Мокчой сиктысь шöр школаса директор Любовь Робертовна Семяшкина вöзйис збыльмöдны "Батьяслöн туйöд" проектлысь выль туйвизь. Сы серти лызьöн котравны окотитысьяслы вöлі индöма мунны Кипиевосянь став сикт-грезд пыр да помавны марафонсö Койю грездын. И котöртны сійö жö туйöдыс, кыті мунісны фронт вылö Изьва районса войтыр. Вöлі индöма пыравлыны войнаса ветеранъяс ордö гортаныс, чолöмавны найöс ыджыд праздникöн, кывзыны казьтылöмъяссö да быдöнлы сетны козинъяс. Сідзжö шуисны котыртлыны школаясын велöдчысьяскöд аддзысьлöмъяс, тöдмöдны найöс Изьваса войтырлöн Ыджыд Вермöмö пуктöм пайöн, "Изьватас" öтмунöмлöн уджöн. Тайö мöвпсö ошкис и школаса директорöс вежысь Татьяна Николаевна Поздеева.
Кык водзмöстчысь ань кутісны корсьны марафонö пырöдчысьясöс. Котöртны окотитісны кыкöн, Мокчойса шöр школаын физкультура велöдысь Игорь Николаевич Чупров да Изьва сиктса пенсионер, районса вöвлöм юралысь Николай Терентьевич Братенков. Сюрисны и козинъяс ньöбöм могысь спонсоръяс, на лыдын "Пера" да "Гулливер" лавкаяс, "Изьватас" öтмунöм. Вöлі шуöма войнаса быд ветеранлы сетны 1 сюрс шайтöн. Татшöмыс Изьва районын колис 15 морт.
Апрель 8 лунö кык марафонеч петісны туйö. Медводз мунісны автобусöн Изьвасянь Кипиевоöдз. Сэтчöс школаын вöлі велöдчысьяскöд да войнаса ветеран Иван Михайлович Артеевкöд медводдза аддзысьлöм. Та бöрын лызьöн мöдöдчисны Кыдзкарö. Сэсся волісны Няшабöжö, Щельяюрö, Вертепö, Сизябö, Бакурö, Мокчойö, Изьваö, Мошьюгаö, Картаёльö, Койюö. Быдлаын вöліны велöдчысьяскöд да ветеранъяскöд кыпыд аддзысьлöмъяс. Марафонечьяскöд пыр топыд йитöд кутісны Любовь Робертовна да Татьяна Николаевна.
Медыджыд коласыс вöлі Мошьюга да Картаёль костын. Сэті 60 километр мунігöн ковмис узьны вöр керкаын. Марафоныс помасис апрель 18 лунö. Апрель 19 лунö Игорь Чупров да Николай Братенков воисны гортаныс. Став сикт-грездъясын накöд аддзысьлыны воліс 600 гöгöр морт. Марафонечьяс снимайтісны "Батьяслöн туйöд" видеофильм, кодöс нимöдасны матысса кадö.
