Война медводдза лунъяссяньыс пырис быд керкаö, быд семьяö. Удораысь уна дас морт – коді повесткаöн корöмöн, коді ас кöсйöмöн – пыр жö муніс фронт вылö. Чирк грездысь О.М. Яковлева колльöдіс фронт вылö нёль, Важгортысь Ф.А. Петрова – вит пиöс, Ёвкöджысь М. Екимов да В. Козырев – квайт пиöн. Ставныс найö повтöг тышкасисны Великöй Отечественнöйлöн фронтъяс вылын.
Нэмöвöйся крестьянин, вöралысь да чери кыйысь Михаил Васильевич Екимовлöн пияныс – Тимофей, Василий, Степан, Иван, Михаил да Фёдор – батьыс моз жö уджалісны колхозын, пöрöдісны вöр, кылöдісны Ву вомöдз кер. Война заводитчис да 1941 вося август 24 лунö фронт вылö мунісны Тимофей да Степан, августас жö нуисны Василийöс, Михаилöс да Иванöс, а сентябрын – вокъясысь медся ичöтсö – Фёдорöс. Иван, Степан да Тимофей бöр гортас эз нин воны. Воддзаясыс усины косьын, а медыджыдыс, Тимофей, юöртöг вошис. Дженьыдика на йылысь пасйöма "Коми Республикаса паметь небöглöн" мöд томын 511-öд лист бокын. Квайтöд томас (508-öд лист бокын) эмöсь мукöд вок йывсьыс пасйöдъяс. Фёдор морöсас мöд степеня Отечественнöй война орденöн чужанінас воöма 1943 воын ранитчылöм бöрын. Василий да Михаил демобилизуйтчöмаöсь война бöрас нин.
Меным мойвиис аддзысьлыны да сёрнитны Михаил Михайлович Екимовкöд кольöм нэмся 80-öд воясö на. Ми сыкöд рöдняöн лоим менам гöтыр пыр. Сылöн война кадся документъясöн подулалöм висьтасьöмыс сетö позянлун видзöдлыны Волховса да Карельскöй фронтъясса ветеранлысь боевöй туйсö.
Комиысь уна салдат тышкасис Волхов фронт вылын. На лыдын вöлі и вöр пöрöдан да кылöдан уджын водзмöстчысь морт Михаил Екимов – 310-öд стрелкöвöй дивизияса 1084-öд стрелкöвöй полкысь радöвöй стрелок, а сэсся миномёт расчётса командир. Тайö полкыслы немечьяслы паныд тышъясын вермöмъясысь Верховнöй Главнокомандующöй квайтысь сетлöма аттьöалана гижöд. Войналöн медся сьöкыд лунъясö да тöлысьясö, кор вöрöг зыртчис Ленинградлань, Тихвин кар бокын Михаил Екимов медводдзаысь веськаліс вир кисьтана косьö.
1943 вося гожöмын вöрöгöс зыран тыш водзын командованиелы зэв ёна коліс немечьяс йылысь юöр. Фашистöс, коді эськö висьталіс ставсö, пленö босьтöм могысь колö вöлі би шер улын кыкысь вуджлыны фронт вомöн. Тайöс вермис вöчны сöмын винёв, повтöм, ён салдат. Буретш татшöмöн и вöлі миян земляк, тöрытъя вöр пöрöдысь, кыйсьысь. Сійö вайöдіс полкса штабö "языктö". Та бöрын гортас бать-мамыслы ыстісны гижöд, мый немечьяскöд тышын командованиелысь тшöктöмсö збыльмöдöмысь да та дырйи повтöмлун петкöдлöмысь сержант Михаил Михайлович Екимовлы 1943 вося июнь 6 лунö сетöмаöсь "За отвагу" медаль. Сэки жö морöсас öшöдісны "Отличный миномётчик" пас.
Новгород кар мездöмысь Михаил Екимовлы сетісны коймöд степеня Слава орден.
Ленинград гöгöр кытш орöдöм бöрын 310-öд дивизияöс вуджöдісны Карельскöй фронт вылö. Свирь ю дорын тышъясысь миянлысь землякöс наградитісны Гöрд Звезда орденöн.
Сержант Екимовлöн миномёт расчётыс асьсö жалиттöг тышкасис вöрöгкöд Хойнице карысь рытыввылынджык немечьяслысь оборонасö пасьвартігöн. Балтийскöй саридзын тöдчана Гдыня военно-морскöй порт босьтігöн смеллунысь сержант Екимовлы сетісны мöд степеня Слава орден.
Куим боевöй ордена кавалерлы войнаыс помасис 1945 вося майын Балтика вылын немечьяслöн ыджыд Свинемюнд военно-морскöй база вöсна тышöн. 1945 вося ноябрын Михаил Екимов бöр воис бать керкаас.
Михаил Михайловичöс пыдди пуктылісны и чужан Ёвкöджас, и Удора районын. Сиктсаяс казьтылöны фронтöвикöс кыдзи война бöрын зіль уджалысьöс. Уна вын-эбöс сетіс сійö потребкооперация сöвмöдöм могысь. 1965 вося июнь 18 лунö М.М. Екимовöс наградитісны "Отличник советской потребительской кооперации" пасöн.
Батьыс моз жö Михаил Михайлович нималіс бур вöралысьöн да чери кыйысьöн. Вöрын либö ю дорын вöвлöм фронтöвик шойччыліс, коллявліс прöст здукъяссö.
* * *
Талун Екимов вокъясысь некод нин абу ловъя. Бöръянас 2000 воын 85 арöсöн кувсьыліс Михаил Михайлович Екимов. Тимофей да Иван Екимовъяс войнаöдзыс ассьыныс семьяяс лöсьöдны эз удитны. А Василийлöн, Степанлöн, Михаиллöн да Фёдорлöн быдмисны да быдмöны 17 ныв-пи, 31 внук, 19 правнук. Найö казьтылöны батьяссö, пöльяссö, прадедъяссö. Михаил Михайловичлöн кык ныв олöны да уджалöны Сыктывкарын, видзöны сы йылысь паметьсö. Став Екимов вокыслöн снимокъясыс эмöсь налöн семьяса альбомын.