Яна Зезегова Кебанъёльын полициялы ас окотаӧн отсасьысьяслӧн котырын зільӧма кольӧмвося июньсянь, а таво тулыснас республикаса районъясысь дружинникъяслӧн конкурсын петкӧдчысьяс пӧвстын сійӧс шуӧмаӧсь медся бурӧн.
Полицияса сотрудникъяскӧд ӧтув Кебанъёльын народнӧй дружинаын зільысьяс нуӧдӧны йӧз пӧвстын олӧмас лёк лоӧмторъясысь видзчысян-ӧлӧдан удж. Кытшовтӧны посёлокса уличаясӧд, ыджыд гажъяс да шойччан лунъясӧ рытнас дежуритӧны участокса уполномоченнӧй Алексей Аверьяновкӧд либӧ пытшкӧс делӧяс министерстволӧн Кулӧмдін районса юкӧнын мукӧд уджалыськӧд, эрдӧдӧны административнӧй оланпас торкалысьясӧс, ӧлӧдӧны тыр арлыдтӧм ныв-зонмӧс лёк оласногӧ сетчӧмысь.
Ен праздникъяс дырйи дружинникъяс ветлӧны и Уллянаӧ видзӧдны пӧрадок бӧрся. Топыд йитӧд кутӧны биысь видзчысян-ӧлӧдан юкӧнысь инспекторъяскӧд, тшӧкыда сёрнитӧны посёлокын олысьяскӧд, мед бура вӧдитчисны биӧн.
Талун, пандемия кадӧ, ыджыд тӧдчанлун сетӧны коронавирус кӧвъялӧмысь видзчысьӧм кузя йӧзкӧд сёрнилы, сідзжӧ ӧлӧдӧны посёлокын олысьясӧс телефон пыр ылӧдчысьяслӧн налькйӧ веськалӧмысь.
Асланыс народнӧй дружинаӧ кебанъёльсаяс ӧтувтчӧмаӧсь 2017 воын. Талун сэні дасысь унджык морт, матӧ ставныс том йӧз.
Медводз котырнас юрнуӧдӧма Ольга Тарабукина, а сэсся Дарья Аверьянова. Кадӧн оз артасьны, водзмӧстчӧны общественнӧй уджас, кӧть эськӧ пӧшти ставныслӧн семья, быдмӧны челядь. Зільӧны, мед посёлоканыс олӧмыс вӧлі лючки-бур.
Яна Зезеговалӧн вӧлӧма ыджыд кӧсйӧм, уджавны полицияын. Эм сылӧн шопералан право да, радейтӧ журъявны машинаӧн. Водзмӧстчысь том аньлӧн дум-кӧсйӧмыс збыльмӧма. Таво майын сійӧс босьтӧмаӧсь удж вылӧ госавтоинспекцияӧ. Ӧні сылӧн медыджыд тӧжд-могыс – видзны-ӧлӧдны йӧзсӧ туй выв ускӧттьӧ-неминучаысь.
Марина Дадашова
Кулӧмдін р
Снимокыс Дарья Аверьяновалӧн
