Июль 8 лунӧ Россияын пасйӧны Семья лун, мӧд ног, Петырлӧн да Феврониялӧн сӧстӧм радейтчӧмлы сиӧм лун. Тайӧ гажсӧ радейтӧны Болгарияын, Белоруссияын, Азербайджанын, Украинаын, Германияын, Великобританияын да Францияын.

Медыджыд гажсӧ, дерт, котыртлӧны Муромын. Ӧд Петыр вӧлӧма Муромса Юрий князьлӧн пиӧн, а Феврония чужлӧма Рязань муын. Налӧн радейтчӧм йылысь гижӧма "Повесть о Петре и Февронии Муромских".

Семья лунсӧ колӧ пасйыны радейтана морткӧд либӧ матыссакӧд да козьнавны катшасин.

Семья лун водзвылын аддзысьлім Сыктывкарысь Ольга Александровакӧд. Уна челядя мам окотапырысь висьталіс асланыс шуда поз, челядьӧс быдтӧм-кок йылӧ сувтӧдӧм йылысь.

Бать-мамлӧн медыджыд шудыс – челядьыс. Владиславлы, Ярославлы да Алиналы найӧ сетӧны сьӧлӧм муслунсӧ да пуктӧны став вынсӧ, медым быдтасъясныс лоины шудаӧсь, шаньӧсь, быдторйын водзмӧстчысьӧсь, аддзисны верстьӧ олӧманыс ассьыныс ордым.

–Талун Россияын олысьяс пасйӧны Семья лун, – шуӧ Ольга. – Сиа и "Коми му" газет лыддьысьяслы олӧманыс став бурсӧ. Радейтӧй матыссаястӧ да лоӧй накӧд пыр орччӧн.

Александровъяслӧн семья олӧ Сыктывкарын. Дас куим во сайын Ольгалӧн да Артёмлӧн кыпыд, сьӧлӧм вӧрзьӧдана радейтчӧмыс вуджис мыйӧкӧ ыджыдджыкторйӧ. Окота лои овны ӧтлаын: асывсӧ вочаавны мусаыскӧд, нимкодясьны сыкӧд да и ӧтув венны олӧмас мытшӧдъяссӧ.

Семьяныс талун вит морта. Ольгалӧн да Артёмлӧн кык пи – Владислав да Ярослав да дыр виччысяна муспоз, ставнысӧ "аслас ичӧт кабырын" кутысь Алина ныв. Ыджыд пиныс велӧдчӧ нин школаын, мӧдыс таво мунас тӧдӧмлун босьтны. Зонкаяс окотапырысь котралӧны юркарса бассейнӧ уявны. Ёнмӧдчӧны тшӧтш и Чиканчилӧн дзоньвидзалун школаын тхэквондоӧн. Вывті ёна радейтӧны спорттӧ! Алиналы арӧсыс на абу да, сы йылысь бать-мамыс оз ёна висьтасьны-петкӧдчыны.

–Верӧскӧд некор эг мӧвпавлӧй, кымын кагаӧс чужтыны-быдтыны да кок йылӧ сувтӧдны, – шуӧ Ольга. – Да и меным ӧткодь вӧлі, ныв чужас али пи. Верӧслы, дерт, медводз пи коліс. И чужис Владислав. Сэки миянысь шудаджыкыс некод эз вӧв. Став муслуннымӧс сетім пинымлы. Но сэсся сійӧ быдмыштіс, "верстяммыштіс", унатор нин ачыс кутіс вӧчны, быдса 4 арӧс тыртіс да. Сэки сэсся и мӧвпыштім, мися, колӧ мӧд кагук. И регыд мысти чужис нӧшта ӧти пи – Ярослав. Сылӧн быдмыштӧм бӧрын, нёль во мысти, мӧвпалім нывка йылысь нин – ӧд меным, кыдзи мамлы, коліс горт гӧгӧрын отсасьысь. И со, Енмыс кыліс да, миян чужис Алина.

Вокъясыс ичӧтик чоюксӧ ёна радейтӧны да лелькуйтӧны. Пыр син уланыс кутӧны, медым Алина оз усь да оз доймы. Со ӧд кутшӧм муса да дона налы дзоля мортыд!

Александровъяслы асланыс семьяыс – тайӧ медся-медся матысса йӧ-зыс, найӧ пыдди пуктӧны ӧта-мӧдсӧ, бура гӧгӧрвоӧны да быдторйын отсасьӧны ёрта-ёртыслы, а медтӧдчанаыс – радейтӧны нинӧм вылӧ видзӧдтӧг. Бать-мамыслы асланыс вир тусьясыс – тайӧ быдлунъя олӧмад помасьлытӧм шуд да радлун.

–Окота, мед челядьным быдмисны шаньӧсь да мывкыдӧсь, пыдди пуктісны олӧма йӧзӧс, кужисны торйӧдны бурсӧ да лёксӧ, – водзӧ юксьӧ аслас мӧвпъясӧн Ольга. – Ыджыд пай челядьӧс быдтӧм-велӧдӧмӧ пуктӧ батьыс. Сійӧ пыр зонкаяскӧд, кӧть быд лун сёрӧдз уджалігад зэв сьӧкыд вичмӧдны кадсӧ.

Александровъяслӧн семьяын ставсӧ вӧчӧны ӧтвылысь: саридз дорын гожйӧдчӧны кӧть вӧр-ваын тшак-вотӧс вотӧны. Ёна радейтӧны кино вылӧ ветлыны. Неважӧн на Ёля-тыын шойччӧмаӧсь, и быдӧн аддзӧма сэні аслыс сьӧлӧм бурмӧдантор да вӧчантор.

Торйӧн нин радейтӧны челядьыслысь спортын ордйысьӧмъяс видзӧдны, пыр жӧ ӧтлаынӧсь. Кокньыдджык ӧд, кор орччӧн матыссаыд тэ вӧсна став сьӧлӧмсяньыс "висьӧ", тэнӧ ыззьӧдігӧн оз пов воштыны ассьыс гӧлӧссӧ.

Александровъяс аддзӧны кад водзмӧстчыны и юркарса уна челядя семьяяслӧн котырын. Дерт, ёнджыка Ольга мамыслӧн тайӧ артмӧ, сійӧ ӧні ичӧтик Алинакӧд пукалӧ гортас, быдтысьӧ.

Тайӧ уна челядя семьяыслӧн медыджыд шудыс – челядьыс. И бать-мамыс пуктӧны став вынсӧ, медым ныв-пиныс быдмисны шуда, шань да водзмӧстчысь войтырӧн, аддзисны ассьыныс ордымсӧ и верстьӧ олӧманыс. Кодкӧ, гашкӧ, шуас, таӧдз пӧ ылынкодь на. А Ольга лыддьӧ, мый ичӧтсяньыс нин кага юрӧ колӧ тэчны став бурсӧ да коланасӧ, сетны позянлун мӧвпавны да аслыныс вӧчны кывкӧртӧдъяс, быдтыны-сӧвмӧдны сійӧс бур оласнога мортӧн, медым вермис вайны ыджыд пӧльза орччӧн олысьяслы да государстволы. Рочӧн кӧ, медым лоис бур гражданинӧн.

Талун Россияын олысьяс пасйӧны Семья лун. И такӧд йитӧдын Ольга чолӧмалӧ ставнысӧ тайӧ тӧдчана гажнас да сиӧ Му вывсьыс став шаньсӧ, бурсӧ да югыдсӧ. Да медым пӧ быдӧнлӧн семьяас вӧлі сӧстӧм муслун да ӧта-мӧдӧс гӧгӧрвоӧм-пыдди пуктӧм.

Надежда Пунегова