Изьва юлӧн шуйга берегын сулалӧ Поромӧсь ичӧтик грезд. Артмылӧма сійӧ 1763 воын. Сэксянь уна нин кадыс колис да, гашкӧ, торйӧн та вӧсна йӧзыс ёна радейтӧны чужанінсӧ да видзӧны грездыслысь историясӧ, нимкодясьӧны вӧр-валӧн мича инъясӧн. Быдӧн гӧгӧрвоӧ татчӧс мичлунсӧ: неылын дзольгӧны визув шоръяс, гӧгӧрбок паськӧдчӧмаӧсь чӧскыд туруна видзьяс, кӧні повтӧг ветлӧны-йирсьӧны мӧсъяс да вӧвъяс.

А кутшӧм мылаа сьылӧны джуджыд пуяслӧн коръясыс гожӧмнас! Шуда кыдзьясыс сетӧны йӧзыслы корӧсь – а пывсянад корӧсясьӧм бӧрын быттьӧ збыльысь выль лов садьмӧ-воссьӧ. Пармаыс тані озыр быдсяма тшак-вотӧсӧн да звер-пӧткаӧн.

Йӧзыс Поромӧсьын уджачӧсь да зільӧсь. Радейтӧны мам кывнысӧ, сёрнитӧны, оз вунӧдны сійӧс. А мортыдлы, кӧть кӧні сійӧ оз ов, чужан кывйыс да муыс медся на донаӧсь. Тайӧ и выныс, и радлуныс, и шудыс миян. Торйӧн нин нимкодь, мый бать-мамыс моз жӧ комиӧн тані сёрнитӧны зонпосни.

Грездыс сулалӧ зэв гажа да мичаинын! Петан асывнас керкасьыд да помтӧг нимкодясян вӧр-ванас, сӧдз ваа Изьва юнас, коді эзысьӧн дзирдалӧ зарни шонді улын.

Тайӧ муса, небыд, мелі серпасыс тӧдса быдӧнлы и чужтӧ пытшкӧсын сӧмын бур да лӧсьыд сьӧлӧмкы-лӧмъяс.

Кутшӧм кӧть олӧмыс эз вӧв мортлӧн, сійӧ тӧдӧ, мый чужан грездыс сійӧс пыр виччысьӧ, некор оз вунӧд да оз эновт.