Кольӧм вежонсянь ӧтуввезйӧн вӧдитчысьяс видзӧдӧны Яджик понлӧн дзоньвидзалун бӧрся. Дом йылын пукалысь гортса пемӧс вылӧ уськӧдчылӧмаӧсь кык кӧин. Зверъяслӧн пиньясысь сійӧс мездӧмаӧсь кӧзяеваыс. А сэсся сылы вӧчӧмаӧсь операция. Ӧні Яджик петавлӧ нин гуляйтны.

Кыдзи дзоньвидзалуныд, Яджик?

Кыдзи висьталӧ Алёна Кренделева кӧзяйкаыс, Мордінын йӧзыс кӧинъясысь полӧны-видзчысьӧны кык во нин. Руд шышъясыд сиктӧдыс весиг луннас кытшлалӧны. Лавкаӧ  мунігмоз пӧ гоннялам, оз-ӧ паныд локны.

Йӧзыс ас овмӧснысӧ гӧгӧрыс кӧрт листӧн кытшовтӧны-потшӧны, но вӧрса зверъясыд вермӧны вомӧныс чеччыштны. Уналысь нин понсӧ да кӧзасӧ вильӧдӧмаӧсь.

—Бур, Яджикӧс вермим мездыны. Пиӧй кылӧма понлысь киргӧмсӧ. Вӧлӧмкӧ, ӧти кӧиныс мышкас тшапкысьӧма, а мӧдыс голяас шашаритчӧма. Сэтшӧма сэки пиӧй горзіс, мед повзьӧдны кӧинъяссӧ. Ӧні весиг ог гӧгӧрвоӧй, кыдзи тайӧ артмис, — казьтылӧ ань. — Операция бӧрын Яджикӧс керкаын видзам. Сылы жар, велалӧма вольерад да, но ковмас кыдзкӧ терпитыштны ранаяс бурдтӧдзыс. Нимкодь, мый кӧть ловйӧн коли.

Ставӧн полӧны

Мордінсаяс унаысь нин элясьлӧмаӧсь сиктса администрацияӧ, мый кӧинъяс матӧ воштӧмаӧсь. Веськӧдлысьыс Олеся Шарикадзе йӧзлысь став татшӧм шыӧдчӧмсӧ ыстӧ полицияӧ, вӧралысьяслӧн котырӧ, республикаса вӧр-ва видзан министерствоӧ.

Сиктса веськӧдлысьлӧн кывъяс серти, сылӧн йӧрӧ пыравлӧмаӧсь жӧ руд шышъясыд. Ставным пӧ полам наысь.

—Сиктын эмӧсь вӧралысьясыс. Быд лоӧмтор бӧрын найӧ туялӧны кӧинъяссӧ. Но оз пыр удайтчы лыйнысӧ, вывті наянӧсь тайӧ зверъясыс да. Сикт гӧгӧр найӧ нёль ордым нин талялӧмаӧсь, — юӧртіс Олеся Шарикадзе.

Сідзжӧ сійӧ пасйис, мый сиктын уличаса сюръяясын биыс ӧзйӧ. Но, тыдалӧ, кӧинъяс югыдсьыс оз пов-ны, луннас кӧ нин сикт гӧгӧрыс шӧйтӧны. Кольӧм да воддза воӧ 11 час лунын руд шышъясыд волӧмаӧсь сиктса олысьлӧн йӧрӧ. Кӧсйӧмаӧсь кӧзаяссӧ вильӧдны. Сы бӧрын мужичӧй гортса пемӧсъяссӧ бырӧдӧма, кута пӧ тай кӧинъясӧс вердны.

Вывті наян

Сыктывкарса вӧралысь Александр Поповлӧн кывъяс серти, кӧиныд — зэв наян звер. Туявны сійӧс абу кокньыд.

—Вермас лоны, сійӧ вильӧдчас карта йӧрад, и чайтан, мый аскинас бара локтас сэтчӧ. Но кыйӧдчыны кӧ кутан — оз. Кӧиныд ныриса, сійӧ кылӧ "засадатӧ", — висьталӧ Александр.

Вывті ёна пӧ рӧдмӧма тайӧ зверыс. Сиктысь кынӧм нурыд кӧиныдлы сюрӧ. Дом йыв понйыд медся кокньыда шедӧ. Кӧиныд сыысь  ыджыдджык да вынаджык. Вермас лоны пӧ, пиянсӧ на вайӧдас велӧдны кыйсьынысӧ. Сэки матігӧгӧрсьыс став кычансӧ и вильӧдасны.

Александр Попов вӧзйӧ вой кежлас понтӧ бурджык дом йывсьыс лэдзны да верандаӧ ли сарайӧ йӧртны.

Куимсёӧс лыясны

Коми Республикаса вӧр-ва видзан министерстволӧн индӧд серти, кӧин лыдсӧ чинтӧм могысь тавося январь 20 лунсянь декабрь 31 лунӧдз шуӧма бырӧдны 300 татшӧм зверӧс. Вӧралан правилӧяс серти позьӧ лыйны пищальысь, а сідзжӧ октыны кӧрт нальк.

Пасъям, кӧин лыйӧмысь таво тшӧтш кутасны сетны 20 сюрс шайт.