Анастасия Лебедик Коми Республикаса опера да балет театрын йӧктӧ мӧдӧд сезон. Том балериналӧн шӧр партияяс абу на вӧлӧмаӧсь, но сійӧ петкӧдчис нин "Россия — Культура" телеканаллӧн "Большой балет" уджтасын.
Том "кодзувлӧн" яръюгыд петкӧдчӧм
Казьтыштам, Комиысь балет труппаысь артистъяс медводдзаысь на веськалісны татшӧм ыджыд проектӧ. "Большой балет" — мирын дзик ӧти телеканалӧн нуӧдан балет конкурс, татшӧмыс абу весиг суйӧр сайын.
Медводдзаыс вӧлӧма 2012 воын да ёна кажитчӧма телепередача видзӧдысьяслы. 2020 воын сійӧс нуӧдісны нёльӧдысь.
—Анастасия, кыдзи тэ чайтан, мыйла буретш тэ веськалін уджтасас? Ачыд та могысь зілин али тэнӧ бӧрйисны?
—Кыдзи тӧданныд, ме сэні эг ӧтнам петкӧдчы, а Ринат Бикмухамедовкӧд. "Большой балет", позьӧ шуны, — том йӧктысьяслы конкурс. И петкӧдчыны сэні вӧзйис Марианна Рыжкина, кольӧм сезонӧ сійӧ на вӧлі театрын главнӧй балетмейстернас. Мыйла бӧрйис буретш менӧ, ог тӧд, но таысь меным зэв нимкодь.
—И тэ, дерт, дзик пыр кӧсйысин?
—Ме джӧмдылі. Кор звӧнитіс, ме вӧлі улича вылын. Шуа, мися, Марианна Альбертовна, позьӧ кӧ, ме аскиӧдз думыштла. И миян заводитчис быдлунъя удж. Программасӧ заводитісны снимайтны июль 15 лунӧ "Мосфильмын", а эфирӧ передачаыс петіс "Россия – Культура" телеканалын декабрын. Вӧлі квайт конкурснӧй петкӧдчӧм.
—Анастасия, "Большой балетын" йӧктісны Россияса медбур те-атръясысь кӧкъямыс пара. И тэныд ӧтнадлы вичмис жюриӧ пырысь нималана балерина Диана Вишнёвасянь козин — сылӧн студияын велӧдчыны. Нимкодь?
—Дерт! Кор Диана Вишнёва шуис менсьым нимӧс, ме "кынмылі", весиг Ринат мышкӧ тувкнитіс: "Тэнӧ корӧны!". Менам лои позянлун велӧдчыны сылӧн студияын. Курсъясыс лоасны августын. И оз гоз-мӧд лун, а быдса тӧлысь.
—Кыдз чайтан, мыйӧн вӧрзьӧдін сылысь сьӧлӧмсӧ?
—Дерт, йӧктӧмӧн. Ог кӧсйы ошйысьны, но миянӧс Ринаткӧд пыр ошкисны. И Марианна Альбертовна, и жюри, и миян театрын зільысьяс эскӧдісны, мый быд петкӧдчӧм вӧлі яръюгыд, ми сӧвмим, пыр бурджыка и бурджыка йӧктім.
Кӧсъя йӧктыны Жизельӧс
Анастасия Лебедик чужӧма Украинаын. Сылы 20 арӧс.
Кыдзи висьталіс, йӧктӧ нёль арӧссянь. Рӧдас балеринаыс абу вӧлӧма, но и ыджыд мамыс, и мамыс мастерӧсь йӧктыны, тшӧкыда петкӧдчылӧмаӧсь худо-жествоа самодеятельносьтын.
Кор Настялы вӧлӧма дас арӧс, семьяыс вуджӧма овны Сыктывкарӧ.
Енбиа нывсӧ мамыс вайӧдӧма Коми Республикаса юралысь бердын искусствояс гимназияӧ.
—Татчӧ вои да, эг на тӧд, мый сійӧ балетыс, — казьтылӧ Анастасия Лебедик. — Украинаын ме йӧзкостса йӧктӧмъяс велӧді. А тані шу-исны — балет пӧ.
—Помнитан ассьыд медводдза уроктӧ?
—Ог тӧд, медводдза вӧлі али эз, но помнита, сувталім да, педагогыс менӧ шуис полюкӧн: гӧгрӧс кынӧмтӧ да какантӧ пӧ ковмас идравны. Но ме сэки эг дӧзмы. Ме ӧні тӧда, балет йӧктысьыдлы гӧн кодьӧн колӧ лоны.
—А ӧні балетыс сьӧлӧмад, либӧ, гашкӧ, йӧзкост-са йӧктӧмыс оз тырмы?
—Ме радейта йӧктыны. Сэки лолӧй, кыдз шуласны, лэбалӧ. Ме весиг ог куж висьтавны, мый мекӧд вӧчсьӧ, кор йӧкта. Шуам, сцена вылӧ петтӧдз майшася, репетиция дырйи ёна зіля-уджала, и сэки кадыс сэтшӧм кузь. А сцена вылӧ пета да — зэв ӧдйӧ лэбыштӧ.
—Анастасия, тэ сӧмын на заводитан йӧктыны, тэ том "кодзув" миян театрын. Кутшӧм рольяс йылысь мӧвпалан?
—Унаӧн кӧсйӧны йӧктыны "Лебединое озероын", а ме ог сы йылысь мӧвпав. Дерт, вӧзъясны кӧ, ог жӧ кут пыксьыны. А ме зэв ёна кӧсъя йӧктыны "Жизельын", а сідзжӧ "Дон Кихотын".
—Йӧктӧмысь ӧтдор, мый тэ радейтан?
—Радейта серпасасьны, ки помысь вӧчасьны, лыддьысьны, но кадыс та вылӧ оз-джык тырмы. Менам олӧмын ӧні медтӧдчанаыс — балет.
